सुटकेशभित्र शव घटना : ई–रिक्सा र चालक प्रहरी नियन्त्रणमा
रौतहट, ९ भदौ । रौतहट प्रहरीले शव भएको सुटकेश फाल्न प्रयोग भएको ई–रिक्सा र चालकलाई पक्राउ गरेको छ ।
माधवनारायण नगरपालिका–६ की २६ वर्षीया रुवीकुमारी साहको हत्यागरी शव लुकाउन प्रयोग भएको ई–रिक्सा र चालकलाई नियन्त्रणमा लिएको प्रहरीले जानकारी दिएको छ ।
पक्राउ पर्नेमा ई–रिक्सा चालक लक्ष्मण महरा हुन् । जिल्ला प्रहरी कार्यालय रौतहटका डिएसपी राजु कार्कीका अनुसार पक्राउ परेका महराले सुटकेशभित्र के सामान छ भन्ने आफूलाई थाहा नभएको प्रहरीमा बयान दिएका छन् ।
ई–रिक्सामा सुटकेशमा राखेर गगापिप्रा गाउँसम्म लैजान भनेको चालक महराले बताए । यस कार्यका लागि चालक महराले पाँच सयमा भाडामा लिएको प्रहरी अनुसन्धानमा खुलेको छ ।
मुडलवा गेटनजिक पुगेपछि ई–रिक्साको चक्कामा समस्या आएको थियो । त्यसपछि ई–रिक्सालाई फिर्ता पठाइ सुटकेश सडकमै राखेर भागेको प्रहरीको भनाइ छ । रुवीको हत्याराको व्यापक खोजी भइरहेको रौतहट प्रहरीले जनाएको छ ।
गौर नगरपालिका–९ मुडवलवा गेटस्थित सडकमा बेवारिसे सुटकेशभित्र रुवीकुमारीको शव फेला परेको थियो ।