सुटकेशमा फेला परेको शवको पहिचान खुल्यो
रौतहट, ८ भदौ । रौतहटको गौर नगरपालिका–९ मुडवलव सडकमा सुटकेशमा फेला परेको शवको पहिचान खुलेको छ ।
माधवनारायण नगरपालिका–६ माधोपुर माइत भइ हाल गौर नगरपालिका–२ महादेवपट्टीमा डेरा गरी बस्दै आएकी २६ वर्षीया रुवीकुमारी साह सुडीको शव रहेको प्रहरीले जानकारी दिएको छ ।
सुटकेशभित्र मृत फेला परेकी महिला भारतको मुज्जफरपुर जिल्ला रक्साटोलका शिवसागर साहको श्रीमती रहेको पुष्टि भएको रौतहटका प्रहरी प्रवक्ता, प्रहरी नायब उपरीक्षक (डिएसपी) राजु कार्कीले बताउनुभयो ।
उहाँका अनुसार ब्युटी पार्लर जान्छु भनेर घरबाट निस्केकी रुवीकुमारी बेलुका ६ बजे परिवारले फोन गर्दा फोन नलागेपछि परिवारले प्रहरीलाई खबर गरेका हुन् ।
आजभन्दा २० वर्षअघिदेखि नै शिवसागर माधोपुर गाउँ छाडेर स–परिवार भारतमा नै बस्दै आएको स्थानीयले बताएका छन् ।
रुवीको एक छोरा छन् । घटनाका बारेमा थप अनुसन्धान गर्न प्रहरीले घटनास्थलनजिकै रहेको एक विद्यालयको सिसिटिभी जाँच गरिरहेको छ । यस विषयमा अनुसन्धान जारी रहेको जिल्ला प्रहरी कार्यलय रौतहटले जनाएको छ ।