शिक्षकहरुमा माग सम्बोधन गर्नेगरी अघि बढेका छौँ : गृहमन्त्री लेखक
काठमाडौँ, २१ चैत । गृहमन्त्री रमेश लेखकले शिक्षकहरुको विषयलाई छिटोभन्दा छिटो सम्बोधन गर्ने गरी अगाडि बढ्ने बताउनुभएको छ ।
बिहीबार आन्दोलित शिक्षकहरुको विषयलाई लिएर भएको छलफलमा उहाँले कार्यवाहक प्रधानमन्त्रीको संयोजकत्वमा भएको बैठक सकारात्मक भएको भन्दै शिक्षकहरुले उठाएको कुरा समावेश गरेर शिक्षा विधेयक अगाडि बढाउने बताउनुभयो ।
उहाँले भन्नुभयो, ‘अहिले पनि शिक्षक महासंघले आफ्ना विषयमा सरकारको ध्यानाकर्षण गर्नका लागि प्रदर्शनहरु गरिराख्नुभएको छ । त्यसकारण अहिले कार्यवाहक प्रधानमन्त्रीको संयोजकत्वमा शिक्षकहरुका सरोकार, ध्यानाकर्षण गराउनुभएका विषयहरु र उहाँहरुले गर्नुभएको प्रदर्शनलगायतलाई मूल्याकंन गरेर शिक्षा विधेयकलाई छिटोभन्दा छिटो अगाडि बढाउने सन्दर्भमा छलफल गरेका छौँ । छलफल सकरात्मक भएको छ । शिक्षा विधेयकलाई छिटो अगाडि सरकारले आफ्नो तर्फबाट भूमिका खेल्छ ।’
सरकार यस विषयमा एकदमै गम्भीर रहेको भन्दै छलफललाई निरन्तर अगाडि बढाउने उहाँको भनाइ छ ।