विश्वभरका विद्यार्थीलाई नेपाल घुम्न प्रोत्साहित गरिरहेका छौँ : धिरज कँडेल [भिडिओ]

काठमाडौँ, १९ चैत । बसन्तकालीन हिमाल आरोहणको मौसम सुरु भएको छ । आरोहणको मौसम सुरु भएसँगै धेरै बाह्य र आन्तरिक पर्यटनहरुहरुको संख्या पनि बढ्दो छ । पर्यटन विभागले आरोहणका लागि अनुमति दिइरहेको छ ।

यसै सन्दर्भमा पर्यटन व्यवसायी एवम् ट्रेकमी नेपालका प्रमुख कार्यकारी निर्देशक धिरज कँडेलले सगरमाथा, अन्नपूर्ण बेसक्याप जस्ता ठाउँहरु अन्य देशमा नभएको भन्दै हामीसँग भएका प्राकृतिक स्रोत र साधनहरुलाई विश्वलाई देखाएर देशले फड्को मार्ने बताउनुभयो ।

उहाँले नेपालको जस्तो आतिथ्यता, प्राकृतिक सौन्दर्यता अन्य मुलुकमा नभएको भन्दै यसलाई पनि प्रवर्द्धन गर्नुपर्ने बताउनुभयो । ‘सगरमाथा, अन्नपूर्ण बेसक्याप अन्य देशमा छैनन् । हामीसँग भएका प्राकृतिक स्रोत र साधनहरुलाई विश्वलाई देखाएर आयआर्जन गर्न सकिन्छ । क्यानाडा, बेलायत, युएस, अष्ट्रेलियाहरुमा राम्रो शिक्षा भएका देश भएकाले विद्यार्थीहरुलाई नेपाल घुम्न जान प्रोत्साहन गरिरहेका छौं,’ उहाँले अगाडि भन्नुभयो,‘नेपालको आतिथ्यता, प्राकृतिक सौन्दर्यता अन्य मुलुकमा छैन । त्यहीँ भएर देशलाई पनि प्रवर्द्धन गरिरहेका छौँ । पर्यटन क्षेत्रलाई अझ व्यवस्थित गर्ने हो भने विदेशी मुद्रा आर्जन गर्न सकिन्छ । देशका लागि फड्को मार्ने योभन्दा उत्तम बाटो अर्को छैन ।’

कतिपय मुलुकहरुसँग नेपाल सिधैँ आउनका लागि हवाई सेवा नभएको भन्दै सिधैँ हवाई सेवा हुने हो भने धेरै विदेशी पर्यटक भित्र्याउन सजिलो हुने उहाँको भनाइ छ ।

शैक्षिक परामर्शदाता समेत रहनुभएका उहाँले विकासको नाममा बाटो खन्ने कामले ट्रेकिङस्थलहरु विनाश भएको दुखेसो गर्नुभयो । त्यसैले सरकारी तहबाट सुधार भयो भने नेपालमा ट्रेकिङ र टुरिज्मको धेरै राम्रो सम्भावना रहेको बताउनुभयो ।

उहाँले भन्नुभयो, ‘अहिले विश्व तापक्रमको कुरा आइरहेको छ । विकासको नाममा विनाश पनि भइरहेको छ । पहिलाको ट्रेकिङस्थलहरुमा गाडी गुडाइएको छ । त्यसकारण पहिलाको जस्तो रमाइलो नहुन सक्छ त्यसैले संरक्षण भने गर्नुपर्छ । ट्रेकिङ स्थलहरुलाई जस्ताको त्यस्तै छोड्नुपर्छ । विकासको नाममा बाटो खन्ने काम गर्नु हुँदैन । सरकारले अझै राम्रो तरिकाले यसलाई व्यवस्थापन गर्नुपर्छ । सरकारी तहबाट केही कुराहरु भयो भने नेपालमा ट्रेकिङ र टुरिज्मको धेरै राम्रो सम्भावना छ ।’

नेपालको जस्तो प्राकृतिक सुन्दरता अन्त कतै नभएको भन्दै नेपालको हरेक ठाउँ पर्यटकीय स्थल बन्न सक्ने पनि उहाँको भनाइ छ । आफ्नो ट्रेकमी नेपाल नामक कम्पनीले ट्रेकिङका दर्जनौँ प्याकेजहरु तयार गरेर विदेशी पर्यटकलाई नेपाल भ्रमण गराइरहेको जानकारी समेत गराउनुभयो ।