काठमाडौँ महानगरपालिकाद्वारा पलेशालाई पाँच लाख रुपैयाँसहित सम्मान
काठमाडौँ, १९ भदौ । काठमाडौँ महानगरपालिकाले पेरिस पारालिम्पिक २०२४ मा कास्य पदक विजेता पारा तेक्वान्दो खेलाडी पलेशा गोवर्द्धनलाई ५ लाख रुपैयाँ नगदसहित सम्मान गरेको छ ।
बुधबार काठमाडौँ प्लाजामा आयोजना गरिएको कार्यक्रममा महानगरपालिकाका प्रमुख बालेन्द्र शाहले सम्मान पत्र र उपप्रमुख सुनिता डंगोलले चेक हस्तान्तरण गर्नुभयो ।
त्यसअवसरमा पलेशाका प्रशिक्षक कविराज नेगी लामालाई ३ लाख रुपैयाँसहित सम्मान गरिएको थियो । यस्तै, पलेशाकी माता पनिता गोवर्द्धन र पिता प्रदीप गोवर्द्धनलाई पनि सम्मान गरिएको थियो ।
सम्मान कार्यक्रममा धारणा राख्दै प्रमुख शाहले नेपालले गर्न सक्छ, भन्ने देखाउन कठिन भइरहेको वर्तमान अवस्थामा ऐतिहासिक पदक दिलाउनुले नेपालले गर्न सक्छ भन्ने सन्देश दिएको बताउनुभयो ।
उहाँले भन्नुभयो, ‘नेपालले गर्न सक्छ, भन्ने देखाउन कठिन भइरहेको वर्तमान अवस्थामा ऐतिहासिक पदक दिलाउनुले नेपालले गर्न सक्छ भन्ने सन्देश दिएको छ । सीमित स्रोतबाट यो पदक हासिल हुनुले खेल क्षेत्रमा जे छ, त्यसैमा पनि गर्न सकिन्छ भन्ने उदाहरण र हौसला दिएको छ ।’
पलेशाका मातापिताको योगदानका कुरा गर्दै उहाँले खेलमा लाग्नेले पढ्दैनन् भन्ने अभिभावकको सोच परिवर्तन हुनुपर्छ भन्ने सन्देश दिएको उल्लेख गर्नुभयो ।
त्यस, क्रममा उपप्रमुख सुनिता डंगोलले पलेशाले आगामी खेलमा भाग लिएको हेर्ने अवसरको अपेक्षा व्यक्त गर्नुभयो ।
छोरीको सफलताका लागि अभिभावकको अहम् भूमिका हुने बताउँदै उहाँले पलेशाका बुबाआमा, सन्तानको सफलताका लागि अभिभावकको भूमिकाका लागि उदाहरण भएको उल्लेख गर्नुभयो ।
त्यस क्रममा पलेशाले खेल अनुभव सुनाउँदै उहाँले भन्नुभयो, ‘मैले प्राप्त गरेको पदक देशकै लागि गौरव हो । यसअघि जापानमा भएको खेलमा दिन नसकेको पदक यसपटक दिलाउन सके ।’