टी–२० विश्वकप : बंगलादेशमाथि दक्षिण अफ्रिका विजयी
काठमाडौँ, २९ जेठ । आइसिसी टी–२० विश्वकपमा बंगलादेश दक्षिण अफ्रिकासँग झिनो रन अन्तरले पराजित भएको छ ।
अमेरिकाको न्यूयोर्कस्थित नासाउ काउन्टी मैदानमा सोमबार राति भएको खेलमा दक्षिण अफ्रिकाले बंगलादेशलाई ४ रनले हराउँदै लगातार तेस्रो जित निकालेको हो ।
दक्षिण अफ्रिकाले दिएको ११४ रनको लक्ष्य पछ्याएको बंगलादेशले निर्धारित ओभरमा ७ विकेट गुमाएर १०९ मात्र बनाएको थियो ।
बंगलादेशका लागि तोहिद हृदोयले ३७, मोहम्मदुल्लाह रियादले अविजित २० रन बनाए । कप्तान नजमुल होसेन सान्तोले १४ रन बनाए । यस्तै, तान्जिद हसन र लिटन दासले समान ९–९ रन जोडे ।
बंगलादेशलाई रोक्न केशव महाराजले सर्वाधिक ३, काशिगो रवाडाले र एनरिच नोत्जेले समान २/२ विकेट लिए।
त्यसअघि टस जितेर पहिले ब्याटिङ गरेको दक्षिण अफ्रिकाले निर्धारित ओभरमा ६ विकेट गुमाएर ११३ रनको योगफल बनाएको थियो । दक्षिण अफ्रिकाका लागि हेनरिक क्लासेनले दुई चौका र तीन छक्का प्रहार गरी सर्वाधिक ४६ रनको महत्वपूर्ण पारी खेले । यस्तै, डेभिड मिलरले पनि २९ रन बनाए । यी दुईबीचको साझेदारी महत्वपूर्ण रह्यो । यस्तै, क्विन्टन डी ककले १८ रन बनाए ।
बंगलादेशका तान्जिन हसन साकिबले सर्वाधिक तीन विकेट लिँदा ताक्षिक अहमेदले दुई र रिसाद हुसैनले एक विकेट आफ्नो नाम गराए ।
दक्षिण अफ्रिका तीन खेलबाट ६ अंकका साथ समूह ‘डी’मा शीर्ष स्थानमा यथावत् छ । तालिकाको दोस्रो स्थानमा रहेको बंगलादेशको २ अंक छ ।