विश्व बैंकलाई माथिल्लो अरुणमा लगानी गर्न सहमत बनायौँ : अर्थमन्त्री पुन
काठमाडौँ, ९ वैशाख । अर्थमन्त्री वर्षमान पुनले विश्व बैंकसँग नेपालमा जलविद्युत्मा लगानी सम्झौता भएको बताउनुभएको छ। अन्तर्राष्ट्रिय मुद्रा कोषको वसन्तकालीन बैठक सकेर शनिबार स्वदेश फर्किनुभएका मन्त्री पुनले त्रिभुवन अन्तर्राष्ट्रिय विमानस्थलमा सञ्चारकर्मीसँग भ्रमण उपलब्धिमूलक भएको बताउनुभयो ।
उहाँका अनुसार माथिल्लो अरुणको १ हजार ६५ मेगावाट विद्युत् उत्पादनमा विश्व बैंकले साढे ८ सय मिलियन डलर (करिब १ अर्ब १३ करोड २८ लाख) बराबरको लगानी गर्ने सहमति भएको छ । सस्तो ब्याजको ऋण दिने र विश्व बैंकले वित्तीय व्यवस्थापन गर्ने सहमति भएको भन्दै उहाँले ६३५ मेगावाटको दुधकोसीमा एसियाली विकास बैंक (एडिबी)ले वित्तीयकरणको नेतृत्व गर्ने तर विश्व बैंकले पनि त्यसमा सहभागी हुने जानकारी दिनुभयो ।
उहाँले भन्नुभयो,‘अहिले अपर अरुणको एक हजार ६५ मेगावाट विद्युत् उत्पादनलाई तयारी अवस्थामा छ हाम्रो । र, त्यसमा विश्व बैंकले नेतृत्व गर्नुपर्छ भनेर हामीले सस्तो ब्याजको ऋणका लागि अनुरोध गरिराखेका थियौँ । यस पटकको एउटा सफलता भनेको यो भयो कि विश्व बैंकले साढे ८ सय मिलियन डलर बराबरको लगानी सस्तो ब्याजको ऋण दिने र उसले नेतृत्व गर्ने सहमति भएको छ । ६३५ मेगावाटको दुधकोसीमा पनि एसियाली विकास बैंक (एडिबी)ले नेतृत्व गर्छ तर विश्व बैंकले पनि त्यसमा हुन्छ ।’
उहाँले विश्व बैंकका उपाध्यक्षसहितको टोलीसँग भएको छलफलपछि नेपालमा कुन फ्रेमवर्कमा लगानी गर्ने भन्ने कुरा टुंगिएको पनि जानकारी दिनुभयो । नेपाली मूलका अमेरिकीहरुबाट नेपालमा लगानी बढाउने प्रतिबद्धता आएको पनि उहाँले सुनाउनुभयो ।
मन्त्री पुनले एमसिसी पदाधिकारीहरुसँग पनि छलफल भएको भन्दै नेपालमा सञ्चालित परियोजना समयमै सम्पन्न हुने विश्वास व्यक्त गर्नुभयो ।
उहाँले नेपालमा विदेशी लगानीकर्ताहरुको बाहुल्य रहँदा अमेरिका तेस्रो स्थानमा रहेको बताउनुभयो । आगामी लगानी सम्मेलनबाट थप लगानी गर्न अमेरिकीहरु इच्छा व्यक्त गरेको उहाँको भनाइ छ । लगानी सम्मेलनमा अमेरिकी चेम्बर अफ कमर्सका उपाध्यक्ष नै उपस्थित हुने उहाँले बताउनुभयो ।
‘समग्रमा हेर्दा अहिलेको लगानीमा अमेरिकन लगानीकर्ताहरु तेस्रो ठुलो लगानीकर्ताका रुपमा नेपालमा रहेछन् । थप लगानी गर्न अमेरिकन लगानीकर्ताहरु तयार र उत्साहित रहेको पायौँ,’ उहाँले भन्नुभयो, ‘लगानी सम्मेलनमा अमेरिकाको चेम्बर अफ कमर्सको उपाध्यक्ष नै उपस्थित हुन स्वीकार गर्नुभएको छ । थप लगानी पनि घोषणा हुने भनिएको छ । आइटी लगायतका क्षेत्रमा लगानीको घोषणा हुँदै छ, सकारात्मक छ ।’