टी–२० विश्वकप छनोटमा नेपालको विजयी सुरूवात
काठमाडौँ, १३ कात्तिक । आइसिसी टी–२० विश्वकप २०२४ अन्तर्गत एसिया छनोटमा नेपालले विजयी सुरूवात गरेको छ ।
सोमबार कीर्तिपुरस्थित त्रिवि क्रिकेट मैदानमा सिंगापुरमाथि ८ विकेटको जित निकाल्दै नेपालले विजयी सुरूवात गरेको हो ।
सिंगापुरले दिएको १४६ रनको लक्ष्य नेपालले १६.३ ओभरमा २ विकेट गुमाएर पूरा गर्यो । नेपालको जितमा ओपनर कुशल भुर्तेलले उत्कृष्ट पारी खेले । उनले ४८ बलमा ८ चौका र २ छक्काको मद्धतमा ७४ रनको योगदान दिए । २६ बलमा अर्धशतक पूरा गरेका भुर्तेलको यो सातौँ टी–२० अन्तर्राष्ट्रि अर्धशतक हो ।
नेपालका अर्का ओपनर आसिफ शेखले २७ रन बनाए । भुर्तेल र शेखबीच पहिलो विकेटका लागि ९.१ ओभरमा ८४ रनको साझेदारी हुँदा नेपाल सहज जिततर्फ अघि बढेको थियो ।
कप्तार रोहित पौडेलले २४ बलमा नटआउट ३५ रन जोड्दा एक बल सामना गरेका कुशल मल्लले छक्का प्रहार गरे ।
त्यसअघि टस जितेर पहिले ब्याटिङ गरेको सिंगापुरले निर्धारित २० ओभरमा ९ विकेटको क्षतिमा १४५ रन बनाएको थियो ।
सिंगापुरका लागि युवा ओपनर रोहन रंगराजनले सर्वाधिक ४६ रनको योगदान दिए । उनले ३० बलमा ९ चौक र १ छक्कासहित ४६ रन बनाए । त्यस्तै, आर्यवीर चौधरीले ३७, मनप्रित सिंहले २४ तथा अक्षा पुरीले १३ रन जोडे ।
नेपालका लागि अभिनाश बोहोराले ३ विकेट लिए भने सन्दीप लामिछाने, गुल्सन झा, करण केसीले समान २–२ विकेट लिए ।
छनोटमा नेपाल समूह ‘ए’मा छ । समूहमा नेपालसँगै सिंगापुर, मलेसिया र ओमान छन् । अब नेपालले भोलि मलेसियासँग दिउँसो १ः३० बजे त्रिवि मैदानमै खेल्ने छ । भोलिको खेलमा जित निकाले नेपालको सेमिफाइनल सम्भावना बलियो हुने छ । नेपालले समूहको अन्तिम खेल बुधबार ओमानसँग खेल्ने छ ।
समूहका शीर्ष दुई टिम सेमिफाइनलमा पुग्ने छन् । सेमिफाइनलमा जित हात परे आगामी वर्ष अमेरिका र वेष्ट इन्डिजमा हुने विश्वकपमा स्थान पक्का हुने छ ।