त्रिकोणात्मक टी–२० सिरिज : हङकङलाई हराउँदै नेपाल फाइनलमा
काठमाडौँ, ४ कात्तिक । त्रिकोणात्मक टी–२० सिरिजअन्तर्गत आज भएको खेलमा नेपाल हङकङलाई पराजित गर्दै फाइनलमा पुगेको छ । मुलपानी क्रिकेट मैदानमा भएको खेलमा नेपालले हङकङलाई ७९ रनले पराजित गर्दै एक खेल अगावै फाइनलमा पुगेको हो ।
नेपालले यसअघि भएको पहिलो खेलमा युएईलाई ७ विकेटले हराएको थियो भने दोस्रो खेलमा हङकङलाई नै ६ विकेटले पराजित गरेको थियो ।
नेपालले हङकङलाई जितका लागि ११४ रनको लक्ष्य दिएको थियो । जवाफमा हङकङले निर्धारित २० ओभरमा ८ विकेटका क्षतिमा १३४ रनमा मात्रै बनाउन सक्यो । हङकङका लागि अंशुमन रथले सर्वाधिक ४५ रनको योगदान दिए । त्यस्तै बाबर हायात २० तथा एजाज खानले २५ रन जोडे ।
नेपालका लागि सोमपाल कामी, करण केसी र ललित राजवंशीले समान २–२ विकेट लिए भने दीपेन्द्र सिंह ऐरी र प्रतिश जिसिले समान १–१ विकेट लिए ।
टस जितेर पहिले ब्याटिङ रोजेको नेपालले निर्धारित २० ओभरमा ६ विकेट गुमाएर २१३ रन बनाएको थियो । नेपालका लागि कुशल मल्ल र दीपेन्द्रसिंह ऐरीले अर्धशतक बनाए । कुशलले ४१ बलमा तीन चौका र ९ छक्काको सहयोगमा ९२ रन बनाए ।
त्यस्तै, दीपेन्द्रले ३४ बलमा छ चौका र दुई छक्काको मद्धतमा ५७ रन बनाए । कुशल मल्ल र दीपेन्द्रले एक सय ४५ रनको साझेदारी गरेका थिए । त्यसैगरी आशिफ शेखले २० रन बनाए भने कप्तान रोहितकुमार पौडेलले ११ रन बनाए ।
हङकङका लागि मोहमद घजन्फरले दुई विकेट लिए भने आयुष शुक्ला, हरुन अर्षद र एजाज खानले समान एक–एक विकेट लिए । अब नेपालले यही असोज ६ गते युएईसँग खेल्नेछ ।