२५० वटा एयरबस विमान किन्दै एयर इन्डिया
एजेन्सी, ३ फागनु । एयर इन्डियाले फ्रान्सको एयरबसबाट २५० वटा विमान खरिद गर्ने भएको छ । यो निर्णय भारतको विमान खरिदको इतिहासमा विश्वको सबैभन्दा ठुलो उड्डयन सम्झौता हो ।
“हामीले एयरबससँग धेरै राम्रो सम्बन्ध बनाएका छौँ । आज म यो घोषणा गर्न पाउँदा खुसी छु कि हामीलाई एयसबसबाट २५० वटा विमान खरिद गर्ने इरादा पत्रमा हस्ताक्षर गरेका छौँ,” टाटा सन्सका अध्यक्ष नटराजन चन्द्रशेखरनले भने ।
टाटा सन्सका अध्यक्षले प्रधानमन्त्री नरेन्द्र मोदी र फ्रान्सेली राष्ट्रपति इम्मानुएल म्याक्रोनको उपस्थिति रहेको भर्चुअल कार्यक्रममा सो धारणा राखेका हुन् । सम्झौतामा ४० ए३५० वाइडबडी अल्ट्रा लङरेन्ज विमान समावेश छन् भने बाँकी न्यारोबडी विमान हुनेछन् ।
भर्चुअल सम्मेलनमा नागरिक उड्डयनमन्त्री ज्योतिरादित्य सिन्धिया, वरिष्ठ उद्योगपति रतन टाटा र अन्य नेताहरूसमेतको उपस्थिति रहेको थियो ।
“एयरबसका लागि एयर इन्डियाको पुनरूत्थानको स्क्रिप्टमा मद्धत गर्नु ऐतिहासिक क्षण हो,” एयरबसका प्रमुख कार्यकारी गुइलाउम फौरीले भने ।