टर्की भूकम्पमा मृत्यु हुनेको संख्या १५ हजार नाघ्यो
एजेन्सी, २६ माघ । टर्की र सिरियामा सोमबार बिहान गएको शक्तिशाली भूकम्पमा परी १५ हजारभन्दा बढीले ज्यान गुमाएका छन् । यो संख्या अझै बढ्नसक्ने अन्तर्राष्ट्रिय सञ्चारमाध्यमले बताएका छन् ।
टर्कीको विपद्सम्बन्धी निकायका अनुसार त्यहाँ ज्यान गुमाउनेहरूको संख्या १२ हजार नाघेको छ । त्यहाँको सरकारी सञ्चारमाध्यमका अनुसार हालसम्म टर्कीमा १२ हजार ३९१ जनाको मृत्यु हुनुका साथै ६२ हजार ९१४ जना घाइते भएका छन् ।
सिरियामा मृतकको संख्या पुष्टि गर्न कठिन भइरहेको छ तर त्यहाँ ३ हजारभन्दा बढीको मृत्यु भएको सरकारी सञ्चारमाध्यम र सहायता संस्थाहरूले जनाएका छन् ।
सिरियाको स्वास्थ्य मन्त्रालयलाई प्राप्त सूचनाअनुसार हालसम्म ३ हजार ४२ जनाको मृत्यु भएको छ ।
अत्याधिक चिसो मौसमबीच उद्धार जारी रहे पनि सहायता संस्थाहरूले भग्नावशेषमा पुरिएका व्यक्तिहरूलाई जीवितै भेट्टाउने सम्भावना कम हुँदै गएको बताइरहेका छन् । योसँगै मृतकको संख्या अझै बढ्न सक्ने छ ।