भारतीय अदालतले सच्यायो सिक्किमका नेपालीभाषीमाथि गरेको विवादास्पद टिप्पणी
काठमाडौँ, २६ माघ । भारतको सर्वोच्च अदालतले सिक्किमका नेपालीभाषीलाई ‘विदेशी मूलका मानिसहरू’ भनेर लेखिएको फैसला सच्याएको छ ।
भारतका सर्वोच्च अदालतको एक फैसलामा लेखिएको ‘विदेशी मूलका आप्रवासी नागरिक’ शब्द हटाउने आदेश सर्वोच्चले दिएको भारतीय सञ्चार माध्यमले बुधबार उल्लेख गरेका छन् ।
आयकरसम्बन्धी विवादमा भारतको सर्वोच्च अदालतले एक महिनाअघि सिक्किमका नेपालीभाषीलाई विदेशी मूलका नागरिक भनेर लेखेको थियो ।
सर्वोच्चले गत जनवरी १३ मा उनीहरस्को पक्षमा फैसला गरेको थियो । फैसलाको क्रममा सर्वोच्चले सिक्किमका बहुसंख्यक नेपालीभाषीलाई नेपालबाट आएका ‘विदेशी’ भनी टिप्पणी गरेपछि सिंगो भारतमा रहेका नेपालीभाषी समुदाय तरंगित बनेको थियो । सिक्किमलगायत क्षेत्रमा भने प्रदर्शन भएको थियो ।
सिक्किम राज्य सरकारले नेपालीभाषीलाई आप्रवासी भनिएको फैसला सच्याउन माग गर्दै रिट हालेको थियो । सोही रिटमाथि सुनुवाइ गर्दै न्यायाधीश एमाआर शाह र बिभी नागरथनाको इजलासले सिक्किमका नेपालीभाषीलाई आप्रवासी भनिएको फैसला सच्याउने आदेश गरेको हो ।