कुन्ती पोख्रेल भन्छिन्– ‘म जे गर्छु त्यो बोल्छु, जे बोल्छु त्यो गर्छु’
काठमाडौँ, २१ कात्तिक । काठमाडौँ निर्वाचन क्षेत्र नम्बर २ मा राप्रपाबाट प्रतिनिधिसभा सदस्य उम्मेदवार बनेकी कुन्ती पोख्रेलले आफ्नो चुनावी प्रचारप्रसारलाई आक्रामक ढंगले अगाडि बढाएकी छन् ।
यो निर्वाचन क्षेत्रमा शंखरापुर नगरपालिका, कागेश्वरी मनोहरा नगरपालिकाको वडा नम्बर ४ देखि ९ र काठमाडौँ महानगरपालिकाको वडा नम्बर ९ र ३२ गरी १७ वटा वडा समेटिएका छन् । यो क्षेत्रअन्तर्गतका सबै वडावासीको घरदैलोमा कुन्ती पोख्रेल पुगिसकेकी छन् ।
सोमबार बिहानैदेखि वडा नम्बर ३ स्थित जर्सीङपौवा, कात्तिकेलगायतका स्थानमा मतदातासँग भेटघाट व्यस्त रहिन् । भेटघाटका क्रममा यहाँका मतादाताले गरेको भव्य स्वागत र जनसागर उर्लिएको देख्दा हाम्रो जित सुनिश्चित भइसकेको खाली चुनावी प्रक्रियाको लागि मंसिर ४ पर्खिनुपर्ने पोख्रेल बताउँछिन् । यसले नेपाली समाजको अपेक्षाअनुसार परिवर्तका लागि बाटो खोलेको पनि बताइन् ।
‘जनताको यो उत्साहपूर्ण स्वागत, सहयोग र समर्थनले हाम्रो जित पक्का भइसकेकाले अब तपाईंहरुको काम गर्न म सेवक बनिसकेँ । मंसिर ४ गते एक दिन मलाई सहयोग गर्नुहोस् म तपाईंहरुको पाँच वर्ष सेबक बन्ने छु,’ पोख्रेलले प्रतिबद्धता जनाइन् ।
‘म यो क्षेत्रमा तपाईंहरुको काम गर्न आएकी हुँ, काम गरेरै छाड्छु,’ उनले थप जोड दिँदै भनिन्, ‘म पहिलाका नेताले जस्तो झुठ बोल्न जान्दिँन जे गर्छु त्यो बोल्छु, जे बोल्छु त्यो गर्छु ।’