राप्रपा उम्मेदवार पोख्रेल कागेश्वरी मनोहराका मतदातासँग भेटघाटमा
काठमाडौँ, १८ कात्तिक । काठमाडौँ क्षेत्र नम्बर २ प्रतिनिधिसभा सदस्यउम्मेदवार कुन्तीदेवी पोख्रेलले वडा नम्बर ८ स्थित कागेश्वरी मनोहराका मतदातासँग भेटघाट गरेकी छन् ।
भेटघाटका क्रममा मतदाताहरुले अन्यले यस क्षेत्रबाट चुनाव जितेर गएको तर फर्केर नआएको गुनासो गरेका छन् । एक स्थानीय मतदाताले भने, ‘यहाँ कहाँ–कहाँबाट झक्कुप्रसाद सुवेदी भोट माग्न आए, हामीले दियौँ जिते पनि तर फेरि फर्केर आएनन् । त्यसैगरी माधवकुमार नेपाल भोट माग्न आए, चुनावपछि मतदाताको पिर मर्का बुझ्न एकपटक पनि फर्केर आएनन् । अब, यो क्षेत्रमा नयाँ अनुहारले चुनाव जित्नुपर्छ ।’ यसैगरी नेताहरुले चुनाव जित्ने अनि फर्केर नआउने हो भने क्षेत्रले फेरि दूरगति झेल्नुपर्ने देखिन्छ ।
भेटघाटका क्रममा पोख्रेलले आफूलाई जनताले जिताएमा यो क्षेत्रका समस्या बुझ्न, समस्या समाधान गर्न तथा नियमित भेटघाटमा आइरहने र आइपरेका काम गर्ने प्रतिबद्धता व्यक्त गरिन् । यसले पनि काठमाडौँ क्षेत्र नम्बर २ मा पोख्रेलको लोकप्रियता बढ्दै गएको देखिन्छ ।