एमालेको घोषणापत्र : श्रमिकको न्यूनतम ज्याला २५ हजार पुर्याइने
काठमाडौँ, १५ कात्तिक । नेकपा (एमाले)ले श्रमिकहरूको न्यूनतम ज्याला २५ हजार रूपैयाँ पुर्याउने प्रतिवद्धता व्यक्त गरेको छ ।
मंगलबार काठमाडौँको याक एन्ड यति होटलमा अध्यक्ष केपी शर्मा ओलीले डिजिटल प्रविधिबाट आसन्न प्रतिनिधिसभा र प्रदेशसभा निर्वाचनका लागि सार्वजनिक गरेको घोषणापत्रमा अधिकांश श्रमिक तथा कर्मचारीलाई सामाजिक सुरक्षाको दायरामा ल्याइने भन्दै श्रमिकलाई न्यूनतम ज्याला २५ हजार रूपैयाँ पुर्याउने उल्लेख गरिएको छ ।
“औपचारिक क्षेत्रका सबै र अनौपचारिक क्षेत्रका ७५ प्रतिशत श्रमिकहरू योगदानमा आधारित सामाजिक सुरक्षाको दायरामा समेटिने छन्,” घोषणापत्रमा लेखिएको छ, “स्वदेश तथा विदेशमा, ज्याला रोजगारी तथा स्वरोजगारीमा रहेका सबैलाई योगदानमा आधारित सामाजिक सुरक्षाको दायरामा समेटिने छ । श्रमिकहरूको न्यूनतम ज्याला मासिक २५ हजार पुर्याइने छ ।”