रियल मड्रिडलाई सुपर कप उपाधि
काठमाडौँ, २६ साउन । आफ्नो करियरको ३२४औँ गोल गर्दै करिम बेन्जेमाले युइएफए सुपर कपको उपाधि रियल मड्रिडलाई दिलाएका छन् ।
बुधबार राति भएको खेलमा फ्रान्कफुर्टलाई २–० ले पराजित गर्दै रियलले सुपर कप उपाधि जितेको हो । रियलको जितमा डेभिड अलाबा र बेन्जेमाले दुवै हाफमा एक–एक गोल गरे ।
बेन्जेमाको उत्कृष्ट प्रदर्शनमा यसअघि रियलले ला लिगा र युइएफए च्याम्पियन्स लिगको उपाधि जितेको थियो ।
बेन्जेमाले रियलका लागि ६१० खेलमा ३२४ गोल पुर्याएका छन् । उनी क्रिष्टियानो रोनाल्डो पछिका दोस्रो सर्वाधिक गोलकर्ता हुन् । ३४ वर्षीय बेन्जेमाले यस सिजन ४६ खेलमा ४४ गोल गरेका छन् ।