काठमाडौँका मेयर साहलाई ओलीद्वारा तबला उपहार
काठमाडौँ, ३० असार । काठमाडौँ महानगरपालिकाका मेयर बालेन्द्र साह (बालेन) र नेकपा (एमाले)का अध्यक्ष केपी शर्मा ओलीबीच भेटवार्ता भएको छ ।
पूर्वप्रधानमन्त्रीसमेत रहेका ओलीलाई भेट्न मेयर साह बुधबार साँझ बालकोट पुगेका थिए । महानगरका विविध विषयमा कुरा गर्न मेयर साह बालकोट गएका थिए ।
अध्यक्ष ओलीसँग साहले आफूले गर्न चाहेका केही दीर्घकालीन महत्वका कामहरु, देशको राजधानी सहरलाई सुन्दर र सफा बनाउन आफूले ल्याएको योजनालगायत विषयमा कुराकानी गरेका थिए ।
बालकोट स्रोतका अनुसार अध्यक्ष ओलीले महानगरले अघि सार्ने जनमैत्री काममा एमालेको सधैँ साथ रहने र एमालेका जनप्रतिनिधिले सधैँ साथ दिने बताएका थिए ।
त्यसक्रममा मेयर साहलाई ओलीले एउटा तबला उपहार दिएका थिए । अध्यक्ष ओली र साहबीच करिब एक घन्टा छलफल भएको थियो ।
ओली र साहबीच यो दोस्रो भेट हो । यसअघि काठमाडौँ महानगरको मेयरको मत गणना जारी रहेकै बेला साह ओलीलाई भेट्न बालकोट पुगेका थिए ।