लोकतन्त्रलाई सुदृढ बनाउन पार्टी बलियो हुनुपर्छ : देउवा
काठमाडौँं । प्रधानमन्त्री एवम् नेपाली कांग्रेसका सभापति शेरबहादुर देउवाले लोकतन्त्रलाई सुदृढ बनाउन कांग्रेस बलियो हुनुपर्ने बताएका छन् ।
पार्टीको १४औँ महाधिवेशनमा भाग लिन यहाँ आएका जिल्ला सभापति, क्षेत्रीय सभापति एवम् महाधिवेशन प्रतिनिधिको सम्मानमा आज बिहान वरिष्ठ नेता रामचन्द्र पौडेलद्वारा आयोजित चियापान कार्यक्रममा उनले प्रजातन्त्र बलियो बनाउन कांग्रेसका नेता तथा कार्यकर्ता लाग्नुपर्ने बताएका हुन् ।
“पार्टीभित्रको निर्वाचनमा हारजित हुन्छ, प्रजातन्त्र र पार्टीलाई बलियो बनाउन सबै लाग्नुपर्छ,” उनले भने । उहाँले पार्टीभित्र अनुशासन र सम्मान गर्ने परम्परा कायम राख्नुपर्नेमा जोड दिए ।
सभापति देउवाले आफूहरुसँगै लोकतन्त्र प्राप्तिका लागि संघर्ष र जेलजीवन बिताएका प्रसँग उल्लेख गर्दै महान् नेताले बोलाएको चियापानमा आउन पाउँदा आफूलाई भाग्यमानी ठानेको बताए ।
पार्टीका वरिष्ठ नेता पौडेलले पार्टीभित्रको गलत प्रवृत्तिका विरुद्धमा आफ्नो लडाइँ सधैँ जारी रहने बताए । “मुलुकमा स्थायित्व, विकास र सुशासन दिन म सधैँ तत्पर रहन्छु, पार्टीको महाधिवेशनमा उम्मेदवार नभए पनि राजनीतिबाट आफूलाई अलग राखेको छैन,” उनले भने ।
वरिष्ठ नेता पौडेलले आफू निष्ठा र प्रतिबद्धतामा विचलित नभएको बताउँदै आफ्नो विवेकको सही प्रयोग गर्न मतदातालाई आग्रहसमेत गरे ।
पार्टी सभापतिका अर्का उम्मेदवार डा.शेखर कोइरालाले पार्टीभित्रको आन्तरिक प्रतिस्पर्धा निर्वाचन भएकाले कांग्रेसलाई बलियो बनाउन सबै लाग्नुपर्ने बताए । उनले अनुशासित पार्टी निर्मााणका लागि सबै लाग्नुपर्ने बताए । नेता कोइरालाले अन्तरआत्मा के भन्छ, त्यहिअनुसारको विवेक प्रयोग गरेर मतदान गर्नसमेत सबै प्रतिनिधिलाई आग्रह गरे ।