‘संविधानको धारा ७६(५)मा पनि ह्विप लाग्छ’
काठमाडौं । महान्यायाधिवक्ता रमेश बडालले प्रतिनिधिसभाका सदस्यलाई दलीय अनुशासनभन्दा बाहिर जाने स्वतन्त्रता नभएको दाबी गरेका छन् ।
प्रतिनिधिसभा विघटनविरुद्धको मुद्धामा संवैधानिक इजलासमा सोमबार बहस गर्दै उनले रिट निवेदक पक्षका कानुन व्यवसायी वरिष्ठ अधिवक्ता सतिशकृष्ण खरेललाई जबाफ दिने क्रममा यस्तो दाबी गरेका हुन् ।
महान्यायाधिवक्ता बडालले भने,“सांसद् बँधुवा मजदुर त होइनन् । तर, दलीय अनुशासनभन्दा बाहिर जाने स्वतन्त्रता उनीहरुलाई छैन ।”
रिट निवेदक तर्फबाट बहस गर्दै आइतबार वरिष्ठ अधिवक्ता खरेलले धारा ७६(५) अनुसार सांसद्हरु दलको बधुँवा मजदुर हुन नसक्ने बताएका थिए ।
महान्यायाधिवक्ता बडालले धारा ७६(५) म दलीय निर्देशन ‘ह्विप’ लाग्ने जिकिर गरेका छन् । यसका लागि उनले खोलानालको उदाहरणसमेत दिए । “विश्वासको मतको दाबी गर्ने त उपधारा ४(नै) रैछ नि । देशभर नदीनाला गएर मिसिने बंगालको खाडीमै रैछ । उपधारा १, २, ३ र ५ जसरी नियुक्त भएपनि विश्वासको मत लिन जाने ठाउँ उपधारा (४) नै हो । अब कुन पानी कर्णालीको, कुन गण्डकी, कुन कोसी कसरी छुट्याउने श्रीमान्, त्यही ७६(४) मा गएर विश्वासको मत लिनुपर्ने भएपछि (५)लाई दलको ह्विप नलाग्ने, अरु उपधारामा ह्विप लाग्ने कसरी भयो ?”