भरतपुर महानगरको आइसोलेसनमा रहेकाको पिसिआर परीक्षण निःशुल्क

चितवन । भरतपुर महानगरपालिकाले बागेश्वरीमा सञ्चालन गर्दै आएको आइसोलेसनमा रहेका संक्रमितको पुनःगरिने पिसिआर परीक्षण पनि निःशुल्क गर्ने भएको छ ।

महानगरले सो आइसोलेसनमा रहेका खानपान, उपचार, आवास सबै व्यवस्था निःशुल्करुपमा गर्दै आएको छ । महानगरपालिकाले योगी नरहरिनाथ योग तथा प्राकृतिक चिकित्सालयसँग सहकार्य गरेर कोरोना संक्रमण भएका महानगरवासीलाई उपचार गर्दै आएको छ । महानगरप्रमुख रेनु दाहालले आइसोलेसमा रहेकाको पिसिआर परीक्षण पनि महानगर आफैँले गर्ने निर्णय गरेको जानकारी दिइन् । सरकारले गरिब, असहाय, कोरोना नियन्त्रणमा अग्र मोर्चामा रहेर काम गर्नेबाहेकको पिसिआर परीक्षण गर्न छोडेको छ । अन्यले आफ्नै खर्चमा पिसिआर गर्नुपर्ने हुन्छ । प्रमुख दाहालले भनिन्, “हामीले आइसोलेसनमा बस्नेलाई आर्थिकरुपमा कुनै भार नहुने गरी परीक्षणसमेत निःशुल्क गर्ने भएका छौँ ।”

महानगरको आइसोलेसन नेपालकै नमूना भएको भन्दै उनले प्राकृतिक चिकित्सा पद्धतिबाट संक्रमितको उपचार भइरहेको जानकारी दिइन् । स्थानीय तहले पहिलो पटक कोरोना नियन्त्रणका लागि भरतपुर महानगरले कोरोना अस्पतालसमेत स्थापना गरी सरकारी अस्पताललाई हस्तान्तरण गरेको भन्दै उनले कोरोना नियन्त्रणमा महानगरवासीको कुनै गुनासो नहुने गरी काम गरिरहेको दाबी गरिन् ।

बागेश्वरी आइसोलेसनमा हालसम्म ३ सय ९ जना भर्ना भएका छन् । जसमध्ये २ सय ४२ जनाले कोरोना जितेर घर फर्किएका छन् भने ६६ जना उपचाररत छन् । त्यहाँका चिकित्सक, कर्मचारी, ठाउँको व्यवस्थापन, औषधि, दैनिक खानाको व्यवस्थालगायतका सबै खर्च महानगरले बेहोरेको प्रमुख दाहालको भनाइ छ ।

चिकित्सालयका प्रमुख डा हेमराज कोइरालाका अनुसार आइसोलेसनमा रहेकालाई आवधिक उपवास विधिबाट उपचार गरिएको छ । जसका लागि बेलुका ५ बजेदेखि बिहान ९ बजेसम्मको समयमा ठोस पदार्थ खान दिइएको छैन । उनले भने, “भाइरस मारेर ऊर्जा उत्पादन गर्ने प्रक्रिया सुरु गरेका छौँ”, यस विधिलाई जाइनो फेजी भनिन्छ ।”

डा कोइरालाले यस विधिमा आठ घण्टा खाने र १६ घण्टा भोकै बस्ने जानकारी दिए । “खाना नखाएपछि शरिरका कोषलाई ऊर्जा पुग्दैन”, उनले भने, “ऊर्जा नपुगेपछि कोषभित्रको भाइरस मारेर ऊर्जा उत्पादन गर्न थाल्छ ।” आइसोलेसनमा रहेकालाई प्राकृतिक चिकित्सा पद्धतिबाट उपचार गरिएको उनको भनाइ छ ।

नियमित व्यायमसँगै खानपिनमा ध्यान दिइएको छ । मधुमेह भएकालाई अरुलाई भन्दा फरक खानाको व्यवस्था गरिएको उनले जानकारी दिए । जसका कारण १० देखि १२ दिनमा संक्रमितलाई निको पार्न सकिएको कोइरालाले जानकारी दिए । आइसोलेसनमा रहेकामध्ये १० प्रतिशत लक्षण भएका छन् भने अन्य लक्षण नभएका छन् ।