कोरोनाबाट नेपालगञ्ज उपमहानगरकी वडा सदस्य परियारको मृत्यु
नेपालगन्ज । नेपालगञ्ज उपमहानगरपालिका वडा नम्बर २ की महिला वडा सदस्यको कोरोना संक्रमणका कारण मृत्यु भएको छ । नेपाली कांग्रेसबाट प्रतिनिधित्व गर्ने ६७ वर्षीया वडा सदस्य शान्ति परियारको सोमबार बिहान साढे १० बजे भेरी अस्पतालमा मृत्यु भएको हो ।
नेपालगन्जको घरबारी टोल निवासी परियारलाई यही कात्तिक ३ गते कोरोना पुष्टि भएको थियो । उनी कात्तिक ४ गते अस्पताल भर्ना भएकी थिइन् । विभिन्न विधिवाट उपचार गर्दासमेत उनलाई बचाउन नसकिएको स्रोत व्यक्ति नरेश श्रेष्ठले बताए । योसँगै बाँकेमा कोरोना संक्रमणबाट मृत्यु हुनेको सङ्ख्या ३४ पुगेको छ । बाहिरी जिल्लाका २१ जनाले पनि बाँकेमा उपचारका क्रममा ज्यान गुमाएका छन् ।
यसैबीच, आजै भेरी अस्पतालमा गरिएको स्वाब परीक्षणमा थप ५३ जनालाई कोरोना संक्रमण पुष्टि भएको छ । अस्पतालद्वारा सोमबार दिउँसो ३ः४५ बजे जारी गरिएको विवरणअनुसार विभिन्न जिल्लाका ५३ जनामा कोरोना भाइरस संक्रमण देखिएको हो । अस्पतालका अनुसार थपिएका नयाँ संक्रमितमध्ये सबैभन्दा बढी २८ जना बाँकेका रहेका छन् भने २० जना बर्दियाका छन् ।
यसैगरी बाँकेमा आजै ४४ कोरोना संक्रमित निको भई घर फर्किएका छन् । जिल्लाका विभिन्न आइसोलेसनमा रहेका २९ पुरुष र १५ महिला निको भइ घर फर्किएका छन् । योसँगै बाँकेमा कोरोना संक्रमण निको हुनेको सङ्ख्या दुई हजार ९ सय २८ पुगेको छ । स्रोत व्यक्ति श्रेष्ठका अनुसार बाँकेमा बिरामी निको हुने दर ९२ दशमलव ४२ प्रतिशत रहेको छ । अहिले जिल्लाका विभिन्न आइसोलेसनमा बाँकेका २ सय ७ र अन्य जिल्लाका १३ गरी २ सय २० जना रहेका छन् ।