नेपाल सुपर लिग : विराटनगरलाई हराउँदै काठमाडौं प्लेअफमा
काठमाडौं । काठमाडौं रेजर्स पहिलो संस्करणको फ्रेञ्चाइज फुटबल प्रतियोगिता नेपाल सुपर लिग (एनएसएल) को प्लेअफमा प्रवेश गरेको छ ।
बिहीबार भएको रोमाञ्चक खेलमा विराटनगर सिटी एफसीलाई ५–४ गोल अन्तरले पराजित गर्दै काठमाडौंले प्लेअफमा स्थान पक्का गरेको हो ।
त्रिपुरेश्वरस्थित दशरथ रंगशालामा काठमाडौंलाई जित दिलाउन मेसौके ओलोमोउले ह्याट्रिक गोल गरे । यस्तै स्टेफेन बिनोङ र छिरिङ गुरुङले एक–एक गोल गरे ।
विराटनगरका पेड्रो मान्जीले दुई गोल फर्काए । यस्तै एडिलाजा सोमिडे र रन्जित धिमालको नाममा एक–एक गोल रह्यो ।
जितसँगै काठमाडौंले ५ खेलमा १० अंक जोडेको छ । यससँगै काठमाडौं प्लेअफमा पुग्ने दोस्रो टिम बनेको छ । विराटनगरले ५ खेलमा ७ अंक जोडेको छ । विराटनगरको पनि प्लेअफ सम्भावना रहेको छ ।
यस्तै आजै भएको पहिलो खेलमा ललितपुर सिटी एफसी विजयी भएको थियो । प्रतियोगितामा पहिलो जित निकाल्ने क्रममा ललितपुरले बुटवल लुम्बिनी एफसीलाई १–० गोल अन्तरले पराजित गर्यो ।