आइपिएल २०२१ : हैदरावादलाई पराजित गर्दै चेन्नइ शीर्ष स्थानमा
काठमाडौं । चेन्नइ सुपर किङ्स १४औँ संस्करणको इन्डियन प्रिमियर लिग (आइपिएल)को शीर्ष स्थानमा पुनः उक्लिएको छ ।
बुधबार सम्पन्न खेलमा सनराइजर्स हैदरावादमाथि चेन्नइ ७ विकेटले विजयी भएको हो ।
हैदरावादले दिएको १ सय ७२ रनको लक्ष्य चेन्नइले १८.३ ओभरमा ३ विकेटको क्षतिमा पुरा गर्यो । चेन्नइको जितमा रितुराज गयकवाड र फाफ डु प्लेसिसले पहिलो विकेटका लागि १ सय २९ रनको शतकीय साझेदारी गर्दै सहज जित सम्भव भयो ।
गयकवाडे ४४ बलमा ७५ र प्लेसिसले ५८ रनको योगदान गरे । यस्तै, सुरेश रैनाले नटआउट १७ तथा मोइन अलीले १५ रन बनाए ।
यसअघि, दिल्लीस्थित अरुण जेट्ली स्टेडियममा टस जितेर पहिले ब्याटिङ गरेको हैदरावादले निर्धारित २० ओभरमा १ सय ७१ रन बनाएको थियो ।
हैदरावादका मनिष पाण्डेले ६१, डेविड वार्नरले ५७ तथा केन विलियम्सनले २६ रन बनाएका थिए ।
जितसँगै चेन्नइ तालिकाको शीर्ष स्थानमा उक्लिएको छ । ६ खेलबाट चेन्नइको १० अंक छ । समान १० अंक भएपनि बैंगलोर दोस्रो, दिल्ली तेस्रो र मुम्बइ चौथो स्थानमा छ ।