परम्परागत चिकित्सा पद्धति वैकल्पिक होइन, मूलधारको उपचार हो : मन्त्री गौतम
काठमाडौँ, ६ पुस । स्वास्थ्य तथा जनसंख्यामन्त्री डा.सुधा गौतमले परम्परागत चिकित्सा पद्धति वैकल्पिक नभइ हजारौँ वर्षदेखि चल्दै आएको मूलधारको उपचार प्रणाली भएको बताउनुभएको छ ।
विश्व ध्यान दिवसको अवसरमा आयोजित समारोहमा बोल्दै मन्त्री गौतमले योग, ध्यान, आयुर्वेदलगायत झारफुक, धामी–झाँक्रीजस्ता पद्धतिहरूलाई पहिले वैकल्पिक उपचारका रूपमा बुझ्ने गरिएको भए पनि अहिले तिनलाई परम्परागत चिकित्सा पद्धति भनेर मान्यता दिन थालिएको उल्लेख गर्नुभयो ।
उहाँले भन्नुभयो, “अहिले विश्वमा नै योग ध्यान आयुर्वेदलगायतका हाम्रा विभिन्न विधाहरु छन् । जसमा झारफुक, धामी–झाँक्रीलगायतका जसलाई पहिला वैकल्पिक भन्थ्यौँ । यी पद्धतिहरू वैकल्पिक होइनन्, हजारौँ वर्षदेखि चलिआएका मूलधारका विषयहरू हुन् । त्यसैले अहिले हामी यसलाई परम्परागत चिकित्सा पद्धति भन्छौँ ।”
यसअघि परम्परागत चिकित्सा पद्धतिको स्पष्ट नेतृत्व कुनै मन्त्रालयले नगरेको अवस्थामा अब स्वास्थ्य तथा जनसंख्या मन्त्रालयले यसलाई महत्त्वपूर्ण अंगका रूपमा अघि बढाएको मन्त्री गौतमको भनाइ थियो ।
मन्त्री गौतमका अनुसार परम्परागत चिकित्सा पद्धतिमा बजेट विनियोजन भइसकेको छ र हजारौँ स्वास्थ्यकर्मीहरू यस क्षेत्रमा कार्यरत छन् । साथै, देशभर सयौँको संख्यामा परम्परागत चिकित्सा सेवा प्रदान गर्ने चिकित्सालयहरू सञ्चालनमा रहेका छन् ।
उहाँले विश्व स्वास्थ्य संगठन (डब्ल्युएचओ)ले पनि आयुर्वेदलाई मूलधारको स्वास्थ्य सेवा प्रणालीमा समावेश गर्नुपर्ने आवश्यकता औँल्याइसकेको जानकारी दिनुभयो ।
उहाँले भन्नुभयो, “परम्परागत चिकित्सा पद्धतिमा बजेट विनियोजन भएको छ । हजारौँ हाम्रा स्वास्थ्यकर्मीहरु कार्यरत छन् । सयौँको संख्यामा हाम्रा चिकित्सालयहरु छन् । अहिले विश्व स्वास्थ्य संगठनले आयुर्वेदलाई मूलधारको स्वास्थ्य सेवा प्रणालीमा ल्याउनुपर्छ भनेर भनिसकेको छ ।”