मानव बेचबिखनका मुद्दामा सहकार्य आवश्यक : महान्यायाधिवक्ता भण्डारी
धुलिखेल, १३ मङ्सिर । महान्यायाधिवक्ता सविता भण्डारीले मानव बेचबिखनका मुद्दामा अनुसन्धान गर्ने, अभियोजन गर्ने र न्याय सम्पादन गर्ने निकायबीच सहकार्य आवश्यक रहेको बताउनुभएको छ । यी निकायबीच सहकार्य हुँदा पीडितले न्याय पाउने उहाँले बताउनुभएको हो ।
शुक्रबार माइती नेपाल र महान्यायाधिवक्ता कार्यालयको सहकार्यमा धुलिखेलमा ‘मानव बेचबिखन प्रभावित÷पीडितमैत्री छिटोछरितो न्याय सम्पादन’ विषयक कार्यशाला गोष्ठीमा उहाँले मानव बेचबिखन तथा ओसारपसारलाई विश्वव्यापी रूपमै गम्भीर अपराध मानिने उल्लेख गर्नुभयो । महान्यायाधिवक्ता भण्डारीले अवैध हातहतियार र लागुऔषधपछिको तेस्रो ठूलो गैरकानुनी व्यापारका रूपमा मानव बेचबिखन रहेको बताउनुभयो ।
उहाँले नेपालमा मानव बेचबिखन तथा ओसारपसारसम्बन्धी कसुरमा आर्थिक वर्ष २०७६/७७ मा ३८५ वटा, आव २०७७/७८ मा ३७५ वटा, २०७८/७९ मा ३८६ वटा, २०७९/८० मा ३६६ वटा र आव २०८०/८१ मा ३७३ वटा मुद्दा अभियोजन गरेको जानकारी दिनुभयो ।
सोही कार्यक्रममा प्रहरी महानिरीक्षक दानबहादुर कार्कीले डिजिटल बोर्डमार्फत नाकाहरूमा सचेतनात्मक सन्देशहरू राखेर सुसूचित गराइरहेको र संयुक्त कार्यदल बनाएर कसरी थप प्रभावकारी बनाउन सकिन्छ भन्ने विषयमा अनुसन्धान अगाडि बढाउन आवश्यक रहेको धारणा राख्नुभयो ।
माइती नेपालका संस्थापक अध्यक्ष अनुराधा कोइरालाले माइती नेपालले सुरुआत गरेको काममा धेरै संस्थाहरूले काम गरिरहेको बताउनुभयो । मानव बेचबिखनको कुरा सीमापारको विषयमात्र नभएर वैदेशिक रोजगार र साना बालबालिकालाई प्रयोग गरी सीमाक्षेत्रमा लागुऔषध ओसारपसार हुने गरेको पाइएकाले उहाँले प्रशासनलाई ध्यानाकर्षण गराउनुभयो ।
शुक्रबारदेखि सुरु भएको दुईदिने गोष्ठीमा पाँचवटा प्रदेशका जिल्ला न्यायाधिवक्ता र जिल्ला प्रहरी कार्यालयका मुद्दा शाखाका अधिकृतहरूको सहभागिता रहेको आयोजकले जनाएको छ ।