कोरोनाबाट थप १३ को मृत्यु : पछिल्लो २४ घन्टामा १,३४३ जना संक्रमित
काठमाडौं । पछिल्लो २४ घन्टामा कोरोना भाइरसबाट थप १३ जनाको मृत्यु भएको छ । योसँगै नेपालमा कोरोना संक्रमणबाट ज्यान गुमाउनेको सङ्ख्या एक हजार ५ सय ५१ पुगेको छ । बितेको २४ घन्टामा नौ हजार २ सय ८९ नमूना परीक्षण गर्दा ८ सय ९ पुरुष र ५ सय ३४ महिलामा संक्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
प्रदेश नम्बर १ मा २ सय ८२, प्रदेश नम्बर २ मा ५१, बागमतीमा ६ सय ५१, गण्डकीमा १ सय ४७, लुम्बिनीमा १ सय ५४, कर्णालीमा १४ र सुदूरपश्चिम प्रदेशमा ४४ संक्रमित थपिएका छन् । बिहीबार दुई हजार १ सय ११ कोरोनामुक्त भएका छन् । नेपालमा कोरोनामुक्त हुनेको सङ्ख्या दुई लाख २० हजार २ सय ७२ पुगेको छ । कोरोना निको हुने दर ९२.७ प्रतिशत पुगेको छ ।
संक्रमितमध्ये १० हजार २ सय ७१ होम आइसोलेसनमा रहेको मन्त्रालयले जनाएका छ । तीन सय ८८ जनाको सघन उपचार कक्ष र ६५ जनाको भेन्टिलेटरमा उपचार भइरहेको छ । मनाङ र डोल्पा कोरोनामुक्त भएका छन् भने झापा, मोरङ, काठमाडौं, भक्तपुर, ललितपुर र कास्कीमा ५ सयभन्दा बढी सक्रिय संक्रमित रहेका छन् ।