चलचित्र ‘लज्जावती’ : दुई करोडको लगानी, दर्शकको हातमा भविष्य
काठमाडौँ, २४ साउन । यही साउन २९ गतेदेखि प्रदर्शनमा आउन लागेको चलचित्र ‘लज्जावती’ प्रेमकथामा आधारित पारिवारिक चलचित्र भएको निर्माण टिमको दाबी छ ।
निर्देशक राज बहादुर सानेको निर्देशन तथा कमल शर्माको निर्माणमा तयार भएको चलचित्रमा प्रेमसँगै पारिवारिक सम्बन्ध, सङ्घर्ष, त्याग, आत्मीयता र नेपाली समाजका विविध पक्षलाई प्रस्तुत गरिएको निर्माण पक्षको भनाइ छ ।
चलचित्रमा अभिनेता श्री कृष्ण निरौला, मुकुन भुसाल, अभिनेत्री मेनुका माझी, जानुका विश्वकर्मा, विनोद श्रेष्ठलगायत कलाकारको अभिनय छ ।
चलचित्रबारे नेपाल न्युज बैङ्कसँग कुरा गर्दै निर्माता कमलप्रसाद शर्माले ‘लज्जावती’मा गरिएको करिब दुई करोड रुपैयाँको लगानी सुरक्षित हुने वा नहुने भन्ने कुरा अब दर्शकको निर्णयमा निर्भर रहने बताउनुभयो ।
निर्माण टिमले आफ्नो तर्फबाट कथा, प्रस्तुति, गीत, ट्रेलर र प्रचारप्रसारमा मेहनत गरिसकेको उहाँको भनाइ छ ।
चलचित्रका गीत र ट्रेलरले पाएको प्रतिक्रियाले निर्माण टिमलाई उत्साहित बनाएको छ । तर, अन्ततः फिल्मको व्यापारका लागि दर्शक हलसम्म पुग्नुपर्ने हुन्छ ।
“दर्शक हलसम्म गइदिनुभयो भने लगानी अटोमेटिक उठ्छ । त्यसैले अहिले हामीलाई सबैभन्दा धेरै दर्शकको साथ र सहयोग चाहिएको छ,” शर्माले भन्नुभयो ।
‘लज्जावती’ यही साउन २९ गते नेपालका विभिन्न हलमा प्रदर्शनमा आउने तयारीमा छ । निर्माण पक्षले चलचित्र नेपालमा मात्र नभइ विदेशमा रहेका नेपाली दर्शकसम्म पनि पुर्याउने तयारी गरेको जनाएको छ ।
निर्माता शर्माले सम्पूर्ण दर्शकलाई साउन २९ गते हलसम्म पुगेर चलचित्र हेर्न आग्रह गर्नुभयो । “देश–विदेशमा रहनुभएका सम्पूर्ण दर्शकलाई साउन २९ गते हलमा आएर ‘लज्जावती’ हेरिदिनुहोस् भन्न चाहन्छु । तपाईंहरूको साथ, सहयोग र मायाको अहिले हामीलाई एकदमै धेरै खाँचो छ,” उहाँले भन्नुभयो ।