मुस्ताङ एयरको हेलिकोप्टर सुरक्षित भेटियो
काठमाडौँ, १३ चैत । आज मध्यान्हदेखि दोलखाको लाप्चा क्षेत्रबाट सम्पर्कविहीन भएको मुस्ताङ एयरको हेलिकोप्टर फेला परेको छ ।
मुस्ताङ एयरका प्रबन्ध निर्देशक रोनान लामिछानेले दोलखाको लाप्चामा उक्त हेलिकोप्टर सुरक्षित भेटिएको राससलाई जानकारी दिनुभयो । क्याप्टेन सुरज थापाको कमाण्डमा रहेको नाइन एन–एएनओ हेलिकोप्टर लाप्चामा सुरक्षित अवतरण गरेको उहाँले बताउनुभयो ।
दोलखाको लाप्चा क्षेत्र लाङटाङको दक्षिण–पूर्वमा पर्छ । प्रबन्ध निर्देशक लामिछानेले सुरक्षित भेटिएको उक्त हेलिकोप्टर भोलि मात्र काठमाडौँ फर्कने बताउनुभयो । उक्त हेलिकोप्टरमा चालक दलका सदस्यसहित पाँच जना सवार रहेका थिए ।