‘लाफा दाइ’को २८ वर्षे आर्ट यात्रा : आर्ट व्यवसायबाटै नाम र दाम दुवै कमाउन सफल

खोटाङ, ४ फागुन । रावाबेँसी गाउँपालिका–४ डुम्रेधारापानीका भोज बहादुर थापा मगर ‘लाफा दाइ’ले आर्ट (चित्रकला) व्यवसाय सुरू गर्नुभएको २८ वर्ष पूरा भयो । कलाकार भोजबहादुर आफ्नो नामले भन्दा कामले परिचित हुनुभएको छ । उहाँको आर्ट फर्मको नाम हो ‘लाफा आर्ट’ । उहाँ आफ्नो वास्तविक नाम (भोज बहादुर)ले भन्दा पनि लाफा दाइ भनेर चिनिने गर्नुभएको छ । लाफा भनेको मगर भाषामा साथी हो ।

स्नातकसम्मको अध्ययन पूरा गरेर जिल्ला फर्कनुभएका भोज बहादुरले विसं २०५४ मा दिक्तेल बजारमा आर्ट व्यवसाय सुरू गर्नुभएको थियो । आधिकारिक रुपमा ‘लाफा आर्ट’ फर्म दर्ता गरेर व्यवसाय सुरू गर्नुभएका भोज बहादुरको अहिले मासिक कमाई ८० हजार रूपैयाँदेखि एक लाख रूपैयाँसम्म हुने गरेको जनाइएको छ ।

जिल्लाको प्रमुख व्यापारिक केन्द्र दिक्तेल बजारस्थित सल्लेसीटोलका गेहकुमार सैँजूको घरमा एउटा कोठा भाडामा लिएर आर्ट व्यवसाय सुरू गर्नुभएका भोजबहादुरले अहिले त्यसैको कमाईबाट आफ्नै घरसमेत किन्न सफल हुनुभएको छ । केही थान कुची र रङको डब्बा राखेर व्यवसाय सुरू गर्नुभएका भोजबहादुरको अहिले फर्ममा मात्रै चार करोड रूपैयाँ बढी लगानी पुगेको भोजबहादुरले जानकारी दिनुभएको छ ।

डुम्रेधारापानी निवासी पदमबहादुर र शुभद्रमाया थापामगरका कान्छो सन्तानका रुपमा विसं २०३४ पुस १५ गते जन्मनुभएका भोज बहादुरले सामाजिक शास्त्रमा स्नातकसम्मको अध्ययन पूरा गर्नुभएको छ । विसं २०६१ सालमा साकेला गाउँपालिका–२ रतन्छाकी रेनुका राईसँग प्रेमविवाह गर्नुभएका भोज बहादुरको दुई छोरी र एक छोरा छन् ।

सुरुमा ब्यानर तथा भित्ते लेखन गर्नुभएका भोजबहादुरको आर्ट फर्ममा अहिले आर्टसम्बन्धीका सम्पूर्ण काम, शिलालेख, ताम्रपत्र, टुडी बोर्ड, लाइभ बोर्ड, थ्रिडी बोर्ड, डिजिटल बोर्ड, निओन बोर्ड, टी–सर्ट तथा छापहरू प्रिन्टलगायत सबै सेवा उपलब्ध छ । बिहानदेखि राति अबेरसम्म सेवाग्राहीको भीड लाग्ने भोजबहादुरको आर्ट फर्ममा उहाँकी श्रीमती रेनुकाले भरपुर सहयोग गर्दै आउनुभएको छ ।

आर्ट व्यवसायबाट नाम र दाम दुवै कमाउनुभएका भोजबहादुरले विभिन्न सङ्घ÷संस्थाबाट सम्मान प्राप्त गरिसक्नुभएको छ ।

ललितकला सङ्गम विराटनगर र रोटरी क्लबले विसं २०५८ तथा खोटाङ वाङ्मय कला प्रतिष्ठानले विसं २०६० मा ताम्रपत्रसहित भोजबहादुरलाई सम्मान गरेको हो ।

सरकारी कार्यालय तथा सार्वजनिकस्थलहरुमा झुन्डिएका बोर्ड तथा ब्यानरहरु सबैमा लाफा आर्ट लेखिएका भेटिन्छन् । आर्टसँगै प्रशिक्षकको भूमिका निर्वाह गर्दै आउनुभएका भोज बहादुरले कला भर्नुभएका आर्टका सामग्री बाहिरी जिल्लाहरु धरान, विराटनगर, राजधानी काठमाडौँलगायत सहरहरुमा समेत निर्यात हुने गरेको छ ।

आर्ट व्यवसायबाटै छोराछोरीको पठनपाठन तथा घरव्यवहार चलाउनाका साथै बचत गर्दै आउनुभएका भोजबहादुर दम्पतीका जेठी छोरी सीमा थापा मगर भारतको बैङ्लोरमा नर्सिङ गर्दै छन् भने कान्छी सन्ध्या थापा मगर काठमाडौँको रिलायन्स कलेजमा विज्ञान विषय लिएर कक्षा १२ तथा छोरा सस्टिन थापामगर दिक्तेल इङ्लिस बोर्डिङ स्कुलमा कक्षा ७ मा अध्ययन गर्दैछन् । धनकुटा बहुमुखी क्याम्पसबाट विसं २०५३ मा स्नातक उत्तीर्ण गर्नुभएका भोज बहादुरले एसएलसीसम्मको अध्ययन गाउँकै देउराली माध्यमिक विद्यालय डुम्रेधारापानीमा गर्नुभएको हो ।

सानै उमेरदेखि चित्रकलामा रुचि राख्नुहुने भोजबहादुर बिना प्रशिक्षण आर्ट पेसामा व्यावसायिक बन्नुभएको बताइएको छ । “मेरो पढाइ एकातिर भयो । व्यवसाय अर्कोतिर । तरै पनि यही व्यवसायबाट नाम र दाम दुवै कमाएको छु”, उहाँले भन्नुभयो, “व्यवसाय सफल हुनुमा रेणुको ठुलो हात छ । सेवाग्राहीको चाप भएको समयमा दुई जना (श्रीमान्÷श्रीमती) मिलेर सेवा दिइरहेका छौँ । सेवाग्रही पनि सन्तुष्ट हुनुहुन्छ ।”

सेवाग्राहीले जिल्लामा हुने मेला÷महोत्सव तथा आमसभाजस्ता सार्वजनिक कार्यक्रमका लागि आवश्यक ब्यानर, सजावटका सामग्रीलगायत सबै भोजबहादुरकै आर्ट फर्म बनाएर लाने गरेका छन् । दिक्तेलस्थित शान्तिटोलमा सञ्चालित लाफा आर्ट फर्मबाट उत्पादित सामग्री आकर्षक र गुणस्तरीय हुने सेवाग्राहीले बताउने गरेका छन् ।

आर्ट व्यवसायमा लामो समयदेखि निरन्तर जमिरहनुभएका भोज बहादुरलाई सेवाग्राहीहरुले जिल्लामा निर्माण भएका पार्क (उद्यान) तथा पाटीपौवामा समेत लगेर कला भर्न लगाउने गरेका छन् । भोजबहादुरले गर्नुभएको आर्ट सुन्दर, सफा र दीर्घकालीन हुने उहाँका सेवाग्राहीहरुले बताउँदै आएका छन् ।

भर्खरै साकेला गाउँपालिकाले निर्माण गरेको साकेला पार्कमा भोज बहादुरले नै आर्ट गर्नुभएको छ । पर्यटन प्रवद्र्धन गर्ने उद्देश्यसहित गाउँपालिकाको लगानीमा निर्माण गरिएको साकेला पार्कमा भोज बहादुरले विभिन्न जातजातिको मौलिक पहिचान झल्कने आकर्षक चित्रहरु कोर्नुभएको छ ।

आर्ट व्यवसायसँगै प्रशिक्षको भूमिका निर्वाह गर्दै आउनुभएका भोज बहादुरका चेलाहरुले जिल्लाका विभिन्न ठाउँमा आ–आफ्नो व्यवसाय सुरु गरेका छन् । आफूले सिकाएका चेलाहरुले आफ्नो ठाउँमा फर्किएर आर्ट व्यवसायलाई व्यावसायिक रुप दिएकामा भोजबहादुर खुसी हुनुहुन्छ । दश स्थानीय तह रहेको जिल्लामा भोजबहादुरसँगै किशोर राई र लक्ष्मण राईले आर्ट व्यवसाय गर्दै आउनुभएको छ । किशोरले ‘रानोहँछा आर्ट’ र लक्ष्मणले ‘दुमी आर्ट’दर्ता गरेर व्यवसाय गर्नुभएको हो । –रासस