राष्ट्रियसभा सदस्यका उम्मेदवारले कुन शीर्षकमा कति खर्च गर्न पाउँछन् ?
काठमाडौँ, १४ पुस । निर्वाचन आयोगले राष्ट्रियसभा सदस्य निर्वाचनका लागि खर्चको सीमा निर्धारण गरेको छ ।
आयोगले राष्ट्रियसभा सदस्य निर्वाचनमा उम्मेदवारले तीन लाख ५० हजार रूपैयाँ बराबरको खर्च गर्न पाउने सीमा निर्धारण गरेको छ ।
आयोगले मतदाता नामावली खरिदका लागि एक हजार रूपैयाँ, सवारी साधनमा ७० हजार रूपैयाँ, सवारी इन्धन १० हजार रूपैयाँ, प्रचारप्रसार सामग्रीमा १४ हजार ५०० रूपैयाँ खर्च गर्न पाउने गरी खर्चको सीमा निर्धारण गरेको छ ।
यसैगरी ढुवानी १० हजार रूपैयाँ, गोष्ठी अन्तरक्रियाका लागि एक लाख रूपैयाँ, अन्य प्रचारप्रसार, छापा एवम् विद्युतीय माध्यममा खर्च १४ हजार ५०० रूपैयाँ खर्च गर्न पाइनेछ । त्यस्तै, कार्यालय सञ्चालन ७० हजार रूपैयाँ, प्रतिनिधि परिचालन ३० हजार रूपैयाँ र विविध शीर्षकमा ३० हजार रूपैयाँ खर्च गर्न पाउनेछन् । आगामी माघ ११ गते राष्ट्रियसभा सदस्य निर्वाचन हुँदै छ ।
उम्मेदवारले खर्च गर्दा बैङ्क वा वित्तीय संस्थामा छुट्टै खाता खोली सोही खाताबाट खर्च गर्न र यसरी खर्च गर्दा निजको तर्फबाट खर्च गर्ने जिम्मेवार पदाधिकारी तोकी गर्नुपर्ने आयोगले जनाएको छ ।
निर्वाचन खर्चको विवरण निर्वाचन सम्पन्न भएपछि सार्वजनिक गरी राष्ट्रियसभा सदस्य निर्वाचन ऐन, २०७५ अनुसार, आयोगमा पेस गर्नुपर्ने छ ।