चितवनलाई चिनाउँदै ‘चितवन राइनोज’

• नारायण अधिकारी

चितवन, ११ मङ्सिर । पर्यापर्यटनको क्षेत्रमा विश्वलाई चिनाएको चितवन राष्ट्रिय निकुञ्जको एक सिङ्गे गैँडा अहिले क्रिकेटको माध्यमबाट पनि चर्चामा छ । त्यही गैँडाको नामबाट स्थापित क्रिकेट क्लब ‘चितवन राइनोज’ ले खेलमार्फत् चितवन र एक सिङ्गे गैँडालाई विश्वसामु चिनाइरहेको छ ।

नेपाल प्रिमियर लिग (एनपिएल)को पहिलो संस्करणबाट खेल्दै आएको चितवन राईनोज दोस्रो संस्करणमा पनि मैदानमा उत्रेको छ । हालसम्म तीन वटा खेल खेलेको राइनोजले दुई जित हासिल गर्दै अग्रस्थानमा छ ।

पहिलो संस्करणमा चौथो स्थान पाएको राइनोजले यस पटक पहिलो बन्ने दाउमा छ । चितवन मेडिकल कलेजको भगिनी संस्थाको रुपमा स्थापित चितवन राइनोजले यहाँ बन्दै गरेको गौतमबुद्ध क्रिकेट रङ्गशाला, भरतपुर महानगरसहित समग्र चितवनलाई राष्ट्रिय र अन्तर्राष्ट्रिय रुपमा परिचित गराएको महानगर प्रमुख रेनु दाहाल बताउनुहुन्छ ।

उहाँले भन्नुभयो “अन्तर्राष्ट्रियस्तरको रङ्गशाला बनिरहेको ठाउँको क्लबले ख्याती पाउदा गर्व लाग्छ ।” यहाँको खेल पर्यटनलाई चितवन राईनोजले बढावा दिने उहाँको भनाइ छ ।

खेल क्षेत्रमा महानगरले प्राथमिकता दिँदै आएको भन्दै उहाँले चितवन राइनोज महानगर र चितवनको आफ्नै क्लब भएको बताउनुभयो । जिल्ला समन्वय समिति चितवनका प्रमुख नारायणप्रसाद अधिकारीले देशका आठ वटा क्लबमध्येको एक क्लब चितवनको रहनु आफैँमा गर्वको विषय भएको बताउनुभयो । उहाँले भन्नुभयो “चितवन जिल्लाको नाममा स्थापित यो क्लब जिल्लाका लागि गौरवको विषय हो ।”

खेलले अनुशासित बनाउने भन्दै उहाँले आम जनसमुदायलाई खेलप्रति आकर्षित गर्न यस्ता क्लब सहयोगी बन्ने बताउनुभयो । चितवन राइनोज खेल्दै गर्दा यहाँका होटल, रेष्टुरेन्ट र सार्वजनिकस्थलमा खेलप्रेमी रमाइरहेको देख्न सकिन्छ ।

सडक किनारका पोलमा मात्रै होटल, रेष्टुरेन्ट र सार्वजनिकस्थलमा पनि चितवन राईनोजको लोगो अङ्कित झण्डा फहराएको देखिन्छ । जिल्ला सर्वत्र खेलमय बने जस्तो प्रतित हुन्छ ।

होटल सङ्घ नेपालका केन्द्रीय सदस्य सुमन घिमिरे क्लबको नामका कारण जिल्ला र पर्यटनलाई अन्तर्राष्ट्रिय रुपमा परिचित गराएको बताउनुभयो । उहाँले भन्नुभयो “चितवन राईनोज सुन्नासाथ दिमाखमा चितवन राष्ट्रिय निकुञ्ज, एक सिङ्गे गैँडाको झल्को आउँछ ।” टेलिभिजन र सामाजिक सञ्जालमार्फत् चितवन राईनोजको नाम फैलिँदै गर्दा त्यसको प्रत्यक्ष फाइदा पर्यटन क्षेत्रमासमेत पुग्ने उहाँको भनाइ छ ।

अरु विषयमा मतभेद देखिए पनि चितवन राइनोजलाई प्रेरणा दिने कुरामा सबै एक ठाउँ उभिएका छन् । बुधबारको खेलमा प्रत्यक्ष दर्शक बन्नुभएका नेपाली कांग्रेस चितवनका सभापति राजेश्वर खनाल जिल्लाको इज्जत चितवन राइनोजले बढाएको बताउनुभयो ।

अन्य क्लबहरु प्रादेशिकस्तरका भए पनि जिल्लाको नामबाट चितवन राईनोज भएको भन्दै उहाँले यहाँको खेल क्षेत्रलाई चलायमान बनाउन र राष्ट्रिय तथा अन्तर्राष्ट्रिय रुपमा चितवनलाई चिनाउन क्लब सहयोगी भएको बताउनुभयो ।

राष्ट्रिय स्वतन्त्र पार्टीका केन्द्रीय सदस्य राजन गौतमले चितवन राइनोजले चितवन जिल्ला र यहाँको एक सिंगे गैंडालाई विश्व जगतमा चिनाएको बताउनुभयो । उहाँले भन्नुभयो “अन्तर्राष्ट्रिय खेलाडी र खेलप्रेमीसम्म यहाँको पहिचान पुग्नु पर्यटन प्रवर्द्धनमा पनि ठूलो अर्थ राख्छ ।” चितवन मेडिकल कलेजले आर्थिक हिसाबले उच्च जोखिम मोल्दै क्लब स्थापना गरेको बताउँदै उहाँले यसले आम नागरिकसँग मेडिकल कलेजलाई जोड्न समेत सहयोग पुगेको बताउनुभयो ।

चितवन राइनोज क्लब चितवन मेडिकल कलेजको भगिनी संस्था हो । क्लबका अध्यक्ष आयुष न्यौपाने हुनुहुन्छ, भने निर्देशक प्रताप देवकोटा र अरुण कोईराला हुनुहुन्छ । खेल भएका दिन ६ वटा बसले यहाँका प्रशंसक खेल मैदानसम्म लैजाने र ल्याउने गरेको छ । निर्देशक देवकोटा स्वास्थ्यसँगै खेल क्षेत्रलाई प्रवद्र्धन गर्न क्लब स्थापना गरिएको बताउनुहुन्छ । उहाँले भन्नुभयो “आर्थिक रुपमा लाभ नभए पनि समग्र चितवनलाई चिनाउन र यहाँको खेल क्षेत्रलाई अगाडि बढाउन क्लब सहयोगी बनेको छ ।”

भरतपुर महानगरपालिकाले अन्तर्राष्ट्रियस्तरको रङ्गशाला बनाइरहेको अवस्थामा चितवन राइनोजको चर्चाले क्रिकेटप्रति यहाँका जनसमुदायलाई आकर्षित गरिरहेको छ । –रासस