जुम्ला र रुकुम पश्चिमका १९ जना कैदीबन्दी अझै फरार

सुर्खेत, २५ असोज । गत भदौ २४ गते जेनजी आन्दोलनका क्रममा जिल्ला कारागार जुम्ला र रुकुमपश्चिमका २९ जना कैदी बन्दी अझै फरार रहेका छन् । फरार कैदीबन्दीमध्ये १९ जना रुकुम पश्चिम र १० जना जुम्ला कारागारबाट भागेका हुन् ।

जेनजी आन्दोलनका क्रममा जुम्लाबाट ४१ र रुकुम पश्चिमबाट ८८ जना केदी बन्दी कारागारबाट भागेका थिए । तीमध्ये जुम्लाबाट ३१ जना र रुकुमपश्चिमबाट ६९ जना केदीबन्दी प्रहरीले पक्राउ गरेको जनाएको छ ।

कारागारबाट भागेका कैदीबन्दीलाई प्रहरीको पटक–पटक सम्पर्कमा आउन अनुरोध गरे पनि सम्पर्कमा आएका छैनन् । फरार कैदीबन्दीको खोजीका लागि जिल्लाभर सशस्त्र प्रहरी र नेपाल प्रहरीले संयुक्त रूपमा निगरानी बढाएको जिल्ला प्रहरी कार्यालय जुम्लाका प्रमुख रबिन बाबु रेग्मीले बताउनुभयो ।

“कारागारबाट फरार भएका कैदीबन्दीलाई आत्मसमर्पण गर्न पटक पटक आग्रह गरे पनि उनीहरुले अटेर गरेका छन्,” उहाँले भन्नुभयो, “फरार कैदीबन्दीको खोजी कार्य जारी रहेको छ ।” फरार रहेका कैदीबन्दीमा अधिकांश विभिन्न आपराधिक मुद्दामा जेल सजाय काटिरहेका थिए ।

जिल्ला प्रहरी कार्यालय रुकुमपश्चिमका सूचना अधिकारी प्रहरी निरीक्षक हरिप्रसाद पुनका अनुसार अझैसम्म १९ जना कैदीबन्दी फरार छन् । जिल्ला प्रशासन कार्यालयले सूचना जारी गर्दै असोज २० गतेसम्म फरार कैदीबन्दीहरुलाई आफैँ कारागारमा आउन समय दिएको थियो । पछिल्लो पटक सम्पर्कमा आउनका लागि दिइएको समयमा पाँच जना मात्र कैदीबन्दी आफैँ सम्पर्कमा आएका हुन् ।

प्रशासनले सम्पर्कमा आउन दिएको असोज १२ गतेदेखि २० गतेसम्मको समयमा पाँच जना मात्र कैदीबन्दी आफैँ सम्पर्कमा आएको प्रहरी निरीक्षक पुनले जानकारी दिनुभयो । अझैसम्म १९ जना कैदीबन्दीहरु बाहिर नै रहेको र खोजी कार्य तीव्र नै पारिएको उहाँले बताउनुभयो ।

जिल्ला कारागारमा कर्तव्य ज्यान, जबरजस्ती करणी, लागु औषध, ज्यान मार्ने उद्योग र हातहतियारसम्बन्धी कसुरमा कैद भुक्तान गरिरहेका ८८ जना कैदीबन्दीरु जेन–जी आन्दोलनको फाइदा उठाउँदै भागेका थिए ।

जिल्ला प्रशासन र प्रहरीले पटक पटक सूचनामार्फत सम्पर्कमा आउन र सम्पर्कमा आए थप कारबाही नहुने भन्दै अपिल गरेका थिए । तोकिएको समयमा नआए कारागार ऐन, २०७९ र अन्य प्रचलित कानुन बमोजिम कारबाही हुने प्रशासनले जनाएको छ ।