क्षतिग्रस्त बिपी राजमार्ग जतिसक्दो छिट्टो सञ्चालनमा ल्याउन मन्त्री घिसिङको निर्देशन
काठमाडौँ, २३ असोज । बाढीपहिरोले क्षतिग्रस्त बनाएको बिपी राजमार्गलाई जतिसक्दो छिट्टो सञ्चालनमा ल्याउने गरी काम गर्न ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले सडक विभाग र निर्माण व्यवसायीलाई आग्रह निर्देशन दिनुभएको छ ।
बिहीबार विपी राजमार्गको अनुगमनमा जानुभएका मन्त्री घिसिङले संघीय राजधानी काठमाडौँसँग बागमती, मधेस र कोशी प्रदेशका जिल्लाहरुलाई जोड्ने लाइफ लाइन सडकलाई जतिसक्दो छिट्टो सञ्चालनमा ल्याउने गरी काम गर्न आग्रह गर्नुभएको हो ।
सडक अनुगनमा मन्त्री घिसिङसहित भौतिक पूर्वाधार तथा यातायात मन्त्रालयका सचिव केशव शर्मा, सडक विभागका महानिर्देशक विजय जैसीलगायतको टोली छन् ।
गत वर्षको बाढीले बिपी राजमार्गको भकुण्डे—नेपालथोक खण्ड क्षति पुर्याएको थियो । उक्त सडक खण्डमा अस्थायी डाइभर्सन निर्माण गरी सञ्चालन गरिएकोमा पुनः यस वर्षको बाढीले करिब चार किलोमिटर सडक पूर्ण रुपमा बगाएको थियो ।
गत वर्षको बाढीले क्षति पुर्याएको सडक स्थायी रुपमा निर्माण गर्नका लागि केही खण्डको ठेक्का लगाइसकेको छ भने केही खण्डको ठेक्का सम्झौता गर्ने अन्तिम प्रक्रियामा रहेको छ ।