सङ्खुवासभामा ५५ जना क्षमताको कारागारमा १३९ कैदीबन्दी
खाँदबारी, २० भदौ । सङ्खुवासभामा ५५ जना क्षमता भएको जिल्ला कारागार खाँदबारीमा एक सय ३९ कैदीबन्दी राखिएको छ । जिल्ला कारागारमा क्षमताभन्दा तीन गुणा बढी कैदीबन्दी हुँदा दैनिक क्रियाकलाप सञ्चालनमा समस्या भइरहेको छ ।
यहाँ एक सय ३१ पुरुष, आठ महिला कैदीबन्दी र दुई जना आश्रित बालबालिका रहेका कारागारका प्रमुख जेलर राजन घिमिरेले जानकारी दिनुभयो । क्षमताभन्दा बढी सङ्ख्यामा कैदीबन्दी भएकाले खानेपानी, सरसफाइलगायत दैनिक क्रियाकलाप सञ्चालनमा समस्या भइरहेको उहाँको भनाइ छ ।
जेलर घिमिरेका अनुसार यो कारागारमा ५० पुरुष र पाँच जना महिलाको क्षमता रहेको छ । कारागार तीन दशमलव पाँच रोपनी क्षेत्रफल फैलिएको बताउँदै उहाँले जग्गा प्रयाप्त नहुँदा थप भवन निर्माण गर्न नसकिएको धारणा राख्नुभयो । “क्षमताभन्दा तेब्बर बढी कैदीबन्दी भएकाले खान, बस्न, शौचालय, सरसफाइलगायत गतिविधिमा समस्या हुँदै आएको छ । पुरानो र साँगुरो भवन भएकाले दैनिक जीवनयापनमा समस्या हुने गरेको कैदीबन्दीको गुनासो छ”, उहाँले भन्नुभयो ।
कैदीबन्दीहरू कारागारमा पुगेपछि मानवीय व्यवहार पाउनुपर्ने भए पनि त्यस अनुरूपको सुविधा दिन नसकिएको जेलर घिमिरेको भनाइ छ । “कैदी सङ्ख्याका आधारमा प्रयाप्त ठाउँ छैन । कारागारमा आपत्कालीन अवस्था आएमा तत्कालै उद्धार तथा सुरक्षा दिनसमेत कठिन छ । कारागारमाथि बजार, तलतिर भिरालो र व्यक्तिको जमिन भएकाले सडक पुयाउन सकिएको छैन”, उहाँले भन्नुभयो ।
कारागार जाने माथितर्फ सानो भिरालो सिडी (भर्याङ) ओर्लिएपछि यहाँ पुग्न सकिने घिमिरेले उल्लेख गर्नुभयो । कुनै विपद् भएर कैदीबन्दीलाई तत्काल उद्धार गुर्नपरेमा एम्बुलेन्स, दमकल वा सुरक्षा निकायका गाडी पुग्नसक्ने सडक नभएको उहाँले बताउनुभयो । कारागारको सुधार तथा क्षमता वृद्धि गर्नका लागि सरोकार भएका निकायलाई पटकपटक अनुरोध गरे पनि हालसम्म सुनुवाइ नभएको उहाँको भनाइ छ ।