भ्रष्टाचारविरुद्ध लड्न खोज्दा सरकार ढालियो : प्रचण्ड
सुर्खेत, २९ वैशाख । नेकपा (माओवादी केन्द्र)का अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ले भ्रष्टाचारविरुद्धको लडाइँ सुरु गरेपछि आफ्नो सरकार ढालिएको आरोप लगाउनुभएको छ ।
पार्टीको भ्रातृ संगठन वाइसिएल नेपालको प्रथम कर्णालीका प्रदेश अधिवेशन उद्घाटन गर्दै भ्रष्टाचारविरुद्धको लडाइँ सुरु गरेको विषय अहिले सरकारमा भएकाहरूलाई मन नपरेका कारण आफू बाहिरिनुपरेको बताउनुभयो ।
वर्तमान सरकार दलाल, बिचौलिया र भ्रष्टाचारीको सरकार भएको प्रचण्डको आरोप छ । ‘म भ्रष्टाचारका फाइल खोल्न लागे’ उहाँले भन्नुभयो, ‘त्यो अभियान भ्रष्टहरुलाई मन पर्ने कुरा भएन, अनि सरकार ढाल्न लागे ।’ आफूलाई शेरा दरबारसँग जोड्ने गरेको त्यसको फाइल खोल्न संसद्मा बोल्दै त्यहाँ जोडिएका शेरा दरबारमा म जोडिएको भए फाइल खोल्न चुनौती दिएको बताउनुभयो । ‘प्रचण्डको शेरा दरबारमा छ भने फाइल खोल भनेको थिएँ,’उहाँले भन्नुभयो, ‘तर उनीहरुले हिम्मत गरेनन् । किनकी मेरो केही थिएन । हामीले सुशासन, न्याय र समानताको कुरा गरेका छौँ ।’
जनताको गणतन्त्र बनाउनका लागि फेरि एउटा नयाँ क्रान्तिको आवश्यक भएको पनि प्रचण्डले दोहोर्याउनुभयो । समाजवादी क्रान्तिका लागि संघर्ष आवश्यक भएको उहाँको भनाइ छ ।
माओवादीले क्रान्ति गरेर ल्याएको गणतन्त्रको स्थायित्वका लागि निर्वाचन प्रणाली परिवर्तन गर्न जरुरी भएको उहाँले बताउनुभयो । प्रत्यक्ष निर्वाचित राष्ट्रपतिका लागि संविधान संशोधन हुनुपर्नेमा उहाँले जोड दिनुभयो ।
अध्यक्ष प्रचण्डले अब माओवादीले कांग्रेस–एमालेको वैशाखी नटेक्ने पनि दाबी गर्नुभयो । आगामी निर्वाचनमा एक्लै बहुमत ल्याउने पार्टी बनाउने आफ्नो संकल्प रहेको बताउँदै त्यसका लागि आफू जनतामा फर्किएको उहाँले उल्लेख गर्नुभयो । ‘अब हामीले जनयुद्ध र जनआन्दोलनमा जस्तै हामी हाम्रै वर्गमा फर्किनु पर्छ भनेर जननतामा फर्किएको छ ।’ हुलाकी मार्ग केन्द्रित अभियान र पार्टीका प्रदेश तहका कार्यक्रम त्यसैको प्रतिफल भएको प्रचण्डले बताउनुभयो ।