नेपालको भूमि चीनविरूद्ध प्रयोग हुन दिइने छैन : शेरहबहादुर देउवा
काठमाडौँ, २२ वैशाख । नेपाली कांग्रेसका सभापति शेरबहादुर देउवाले चीनको खिलाफमा नेपालको भूमि प्रयोग गर्न नदिने प्रतिबद्धता जनाउनुभएको छ ।
सोमबार जिपी कोइराला फाउन्डेसनले काठमाडौँमा आयोजना गरेको नेपाल–चीनबीचको ७० वर्ष लामो सम्बन्ध दर्शाउने फोटो प्रर्दशनीमा बोल्दै उहाँले एक चीन नीति नेपालले लिएको भन्दै चीनको खिलाफमा नेपालको भूमि प्रयोग गर्न नदिइने प्रतिबद्धता जनाउनुभयो ।
उहाँले भन्नुभयो, ‘यो फोटो प्रदर्शनीले चीनसँगको सहकार्यलाई थप मजबुत बनाउँदै दुई देशको सम्बन्धलाई थप उचाईमा पुर्याउने विश्वास लिएको छु । मैले सधैँ भन्ने गरेको छु । एक चीन नीति नेपालले लिएको छ । मित्र राष्ट्र चीनको खिलाफमा नेपालको भूमि प्रयोग हुन दिइने छैन भन्ने विश्वास फेरि पनि दिलाउन चाहान्छु ।’
त्यस्तै, उहाँले चीनले नेपालको पूर्वाधार विकास, व्यापार, पर्यटन, सांस्कृतिक, शैक्षिक आदानप्रदान, जलवायु परिवर्तन एवम् वातावरणीय सहकार्य लगायतका क्षेत्रमा सहयोग गर्दै आएको भन्दै आगामी दिनमा पनि थप सहयोग गर्ने विश्वास व्यक्त गर्नुभयो ।
उहाँले भन्नुभयो, ‘मित्र राष्ट्र चीनले नेपालको पूर्वाधार विकास, व्यापार, पर्यटन, सांस्कृतिक, शैक्षिक आदानप्रदान, जलवायु परिवर्तन एवम् वातावरणीय सहकार्यलगायतका क्षेत्रमा सहयोग गर्दै आइरहेको छ । मलाई विश्वास छ चीनले आगामि दिनमा नेपालको थप विकासमा सहयोग गर्ने नै छ ।’