अनावश्यक रुपमा शिक्षक विरोधी भाष्यहरु निर्माण भएका छन् : अध्यक्ष सुवेदी
काठमाडौँ, ३ वैशाख । नेपाल शिक्षक महासंघका अध्यक्ष लक्ष्मीकिशोर सुवेदीले अहिले अनावश्यक रुपमा शिक्षक विरोधी भाष्यहरु निर्माण भएको बताउनुभएको छ ।
बुधबार काठमाडौँमा आयोजित शिक्षा बहस कार्यक्रममा बोल्दै उहाँले अहिले अनावश्यक रुपमा शिक्षक विरोधी भाष्यहरु निर्माण भएको भन्दै त्यसले शिक्षकको उत्साह अभिप्रेरणा पनि नजगाउने र विद्यालय शिक्षा पनि उभो नलाग्ने बताउनुभयो ।
उहाँले भन्नुभयो, ‘अहिले अनावश्यक रुपमा शिक्षक विरोधी भाष्यहरु निर्माण भएको छ । त्यसले शिक्षकको उत्साह अभिप्रेरणा पनि जगाउँदैन र विद्यालय शिक्षालाई पनि उभो लादैन । त्यसैले त्यो कुरामा पनि सर्तक हुनुपर्छ । शिक्षकले सबै कुरा नियन्त्रणमा लिएर सम्पूर्ण दायित्व निर्वाह गर्न सक्दैन ।’
त्यस्तै, उहाँले सामाजिक सञ्जालमा आन्दोलनमा सहभागि नहुने शिक्षकलाई महासंघले कारबाही गर्ने भन्ने हल्ला गलत रहेको स्पष्ट पार्नुभयो । पेसाकर्मीले दुनियाँमा कहीँकतै पनि आन्दोलन गर्दा तलब नछोड्ने चलन रहेको भन्दै आफूहरुले पनि तलब नछाड्ने बताउनुभयो ।
उहाँले भन्नुभयो, ‘सामाजिक सञ्जालमा आन्दोलनमा सहभागि नहुने शिक्षकलाई महासंघले कारबाही गर्ने भनेर आएको छ । त्यो हामीले कतै लेखेको छैन । हाम्रो तर्फबाट नलेखिएको तर व्यक्ति कसैले लेख्नुभएको छ भने हामी जिम्मेवार छैनौँ । हामीले तलब खाने हो । पेसाकर्मीले दुनियाँमा कहीँकतै पनि आन्दोलन गर्दा तलब छोड्दैनन् । हामी तलब छोड्दैनौँ । हामी त काम नै गरिराखेका छौँ । शिक्षा क्षेत्रको निर्माणका लागि आन्दोलनको काम गरिराखेको छैनौँ ?’
त्यस्तै, उहाँले समाजमा शिक्षकहरुको माग मुद्दाको बारेमा कोही कसैले पनि नबोलिने कारण आफूहरुनै बोल्न बाध्य भएको बताउनुभयो । गुणस्तर शिक्षाका लागि शिक्षणयोग्य वातावरण चाहिने भन्दै यो वातावरण निर्माणको लडाइँमा आफूहरु रहेको उहाँको भनाइ छ ।
उहाँले भन्नुभयो, ‘हाम्रो माग मुद्दामा सेवा सुविधाको कुरा धेरै छन् । त्यसको बाध्यता के छ भने समाजमा हामी बाहेक हाम्रो माग मुद्दाको बारेमा कोही बोलिदिँदैन । त्यसो भएपछि हामीले नै हाम्रो माग मुद्दा बिर्सियौँ भने समाजमा कसले उठाइदिने ? गुणस्तर शिक्षाका लागि शिक्षणयोग्य वातावरण चाहिन्छ । यदि शिक्षकबाट त्यो अपेक्षा गर्छौँ भने त्यो वातावरण निर्माण गर्दिन सक्नुपर्छ । त्यो लडाइँमा नै हामी छौँ ।’