सप्तरीको नमोबुद्ध क्लबलाई भीमनारायण गोल्डकपको उपाधि

धनकुटा, २४ चैत । धनकुटामा भएको १७औँ सहिद भीमनारायण गोल्डकपको उपाधि सप्तरीको नमोबुद्ध युथ क्लबले जितेको छ । सदरमुकामस्थित तल्लो टुँडिखेलमा शनिबार सम्पन्न खेलमा उदयपुरको गाईघाट फुटबल क्लबलाई पेनाल्टी सुटआउटमा ५–३ गोलअन्तरले पराजित गर्दै नमोबुद्धले उपाधि जितेको हो ।

निर्धारित समयमा २/२ गोलको बराबरीमा खेल सकिएपछि भएको पेनाल्टी सुटआउटमा गाईघाटका धिरेन क्षेत्रीको प्रहार नमोबुद्धका गोलकिपर रविन बस्नेतले रोकेपछि सप्तरी विजयी भएको हो । पेनाल्टी सुटआउटमा नमोबुद्धको तर्फबाट विवेक राई, हेमन्त भूजेल, प्रवेश दनुवार, सनम धिमाल र आयुष मगरले गोल गरे । यस्तै, गाईघाटको तर्फबाट निश्चल मोक्तान, आकाश राई, प्रविन राईले गोल गरेका थिए ।

खेलको पहिलो हाफको ४०औँ मिनेटमा राज भुसालले गोल गर्दै नमोबुद्धलाई सुरुआती अग्रता दिलाएका थिए । त्यसलगत्तै ४१औँ मिनेटमा गाईघाटका आकाश राईले गोल गरेर खेललाई बराबरी बनाए । नमोबुद्धका क्षितिज भण्डारीले ४४औँ मिनेटमा एक गोल गरेपछि २–१ को अन्तर भएको खेल, दोस्रो हाफको ८३औँ मिनेटमा उदयपुरका अशिम राईले गोल गरेपछि बराबरीमा टुङ्गिएको थियो ।

फाइनल खेलको म्यान अफ दी म्याच नमोबुद्धका गोलरक्षक रविन बस्नेत, सर्वोत्कृष्ट खेलाडी राज भुसाल, उत्कृष्ट डिफेन्डर आयुष मगर, उकृष्ट मिडफिल्डर विवेक राई, उत्कृष्ट प्रशिक्षक सुरेश लामा घोषित भए । यस्तै, उत्कृष्ट स्ट्राइकर गाईघाटबाट खेल्ने विदेशी खेलाडी फोफाना घोषित भए ।

उपाधि बिजेता नमोबुद्धले नगद चार लाख ९९ हजार ९९९ सहित ट्रफी र उपविजेता गाईघाटले नगद दुई लाख ५० हजारसहित ट्रफी प्राप्त गरेको छ । विजेता तथा उपविजेता दुवै टोलीलाई कार्यक्रमका प्रमुख अतिथि धनकुटा नगरपालिका प्रमुख चिन्तन तामाङ तथा आयोजक सहिद भिमनारायण स्मृति प्रतिष्ठानका अध्यक्ष पुरेन्द्रलाल श्रेष्ठलगायतले पुरस्कार वितरण गरेका थिए ।

विसं २०५५ देखि हुँदै आएको खेलको यस संस्करणमा आठवटा टोलीको सहभागिता रहेको थियो । तत्कालीन राजा बिरेन्द्रलाई बम प्रहार गरेको आरोपमा २०३५ सालमा मृत्युदण्ड दिइएका सहिद भीमनारायण श्रेष्ठको स्मृतिमा हरेक प्रतिष्ठानले प्रतियोगिता आयोजना गर्दै आएको छ ।