लोकतान्त्रिक गणतन्त्रात्मक व्यवस्थाको विकल्प राजतन्त्र हुनै सक्दैन : रेखा शर्मा
काठमाडौँ, १८ चैत । नेकपा (माओवादी केन्द्र)की सांसद रेखा शर्माले वर्तमान संघीय लोकतान्त्रिक गणतन्त्रात्मक व्यवस्थाको विकल्प राजतन्त्र हुनै नसक्ने बताउनुभएको छ ।
सोमबार प्रतिनिधिसभाको बैठकलाई सम्बोधन गर्नुहुँदै उहाँले राजतन्त्रतिर जाने कुरा विकल्प नभएर पश्चगमनमात्रै रहेको बताउनुभयो । पश्चगमनको पक्षमा आफूहरु यसअघि कोही पनि नरहेको र नहुने पनि बताउनुभयो ।
उहाँले भन्नुभयो, ‘गत चैत १५ गते देशको राजधानी काठमाडौँमा दुईवटा कार्याक्रम भए । समाजवादी मोर्चाको नाममा हाम्रो पार्टीसहित ५०औँ हजारको उपस्थितिमा जनप्रदर्शन भयो । गणतन्त्रको पक्षमा, संविधानको पक्षम, परिवर्तिन परिवेशको पक्षमा आफ्नो दृढता व्यक्त गर्यौँ । तीनकुनेको प्रदर्शनको प्रत्यक्ष कमाण्ड कथित कमाण्डर दुर्गा प्रसाईले गरेका छन् । तर, हामी सबैले के बुझेका छौँ भने यसको पर्दा पछाडि पूर्वराजा ज्ञानेन्द्र शाह छन् । उनको उक्साहटमा, उनले पटक–पटक गरेका आह्वानमा, अपिलमा युवाहरु समाहित भएका छन् । म सरकारसँग सभामुखमार्फत् के माग गर्न चाहन्छु भने–राजतन्त्र अहिलेको व्यवस्था होइन । संविधान भन्दामाथि कोही छैन । कानुनभन्दा माथि कोही छैन । त्यसकारण चाहे पूर्वराजा ज्ञानेन्द्र शाह हुन्, चाहे सामाजिक सञ्जालमा सक्रिय, अहिले लुकेर बसेका दुर्गा प्रसाई हुन् । सबैलाई कारबाही गरोस् ।’
उहाँले तीनकुनेको हिंसात्मक प्रदर्शनमा पूर्वराजा ज्ञानेन्द्र शाह र कथित जनकमाण्डर दुर्गा प्रसाईलाई तत्काल कारबाहीको दायरामा ल्याउनसमेत सरकारसँग माग गर्नुभयो । उहाँले अहिलेको राजतन्त्र कि गणतन्त्र भन्ने प्रश्न नै बेकाम रहेको बताउनुभयो ।
उहाँले माओवादीले गरेको १० वर्ष सशस्त्र संघर्षको जगमा २०६२/६३ सालको जनआन्दोलन भएको र आफूहरु राजतन्त्र फाल्नकै लागि १० वर्ष जनयुद्ध लडेको बताउँदै उहाँले व्यवस्थालाई चुनौती दिने कुरा स्वीकार्य नरहेको बताउनुभयो ।
उहाँले भन्नुभयो, ‘अहिले गणतन्त्र कि राजतन्त्र ? यो बहस गर्ने ठाउँमै अहिले छैनौँ । किनभने संघीय लोकतान्त्रिक गणतन्त्र हामीले निरङ्कुश राजतन्त्रको विरुद्धमा लडेर ल्याएका हौँ । लडेर ल्याएको व्यवस्थामा सबैको अपनत्व छ । २०६२/६३ को आन्दोलन १०वर्षे जनयुद्धको जगमा भएको थियो । त्यो आन्दोलन बगेको हजारौँ जनताको रगतको प्रतिफल स्वरुप यो गणतन्त्र प्राप्त भएको हो ।’