पेस्तोलसहित भारतीय नागरिक पक्राउ
रौतहट, ७ माघ । रौतहटबाट सशस्त्र प्रहरीले पेस्तोलसहित एक भारतीय नागरिकलाई पक्राउ गरेको छ । नेपाल भारत सीमा क्षेत्र नजिक पर्ने इशनाथ नगरपालिका-४ को लतमरीबाट सशस्त्र प्रहरीले आइतबार राति पक्राउ गरेको हो ।
भारत विहार पूर्वी चम्पारण जिल्ला मोतिहारी बसन्तपुर ग्रामपञ्चाय वडा नम्बर ९ का २६ वर्षीय धनञ्जयकुमार झालाई पक्राउ गरिएको सशस्त्र प्रहरी बल नेपाल नम्बर ११ गणका गणपति (एसपी) विक्रम हुमागाईंले बताउनुभयो ।
उहाँका अनुसार पक्राउ परेका व्यक्तिको साथबाट अटोमेटिक पेस्तोल १ थान, म्याग्जिन १ थान, ७.६७ मि.मि ४ राउण्ड गोली बरामद भएको छ । घटनास्थालबाट बिआर ०५ बिडी १२२४ नम्बरको मोटरसाइकल बरामद गरिएको उहाँले जानकारी दिनुभयो ।
तीनजना व्यक्ति एक होटलमा बसेर खाजा खाइरहेको र गतिविधि शंकाष्पद रहेको खबर पाउन साथ सशस्त्र प्रहरी बलको टोली मठियाबाट खटिएको एसपी हुमागाईंले बताउनुभयो ।
आइतबार राति साढे ८ बजेको समयमा उक्त पसलमा सशस्त्र प्रहरीको टोली पुग्दा दुई जना भागे पनि हतियार बोकेका एक जना व्यक्तिलाई पक्राउ गर्न सफल भएको सशस्त्र प्रहरी बल नेपाल नम्बर ११ गण रौतहटले जनाएको छ ।
पक्राउ परेकाको आवश्यक कारबाहीका लागि नेपाल प्रहरीलाई जिम्मा लगाउने तयारी भइरहेको रौतहट सशस्त्र प्रहरीले जानकारी दिएको छ ।