पोखराको इञ्जिनियरिङ क्याम्पसमा अध्ययनरत संगम पौडेल मृत फेला
पोखरा, २५ पुस । पोखराको लामाचौरस्थित पश्चिममाञ्चल इञ्जिनियरिङ क्याम्पस (डब्लुआरसी) अध्ययनरत एक छात्र क्याम्पसनजिकै रहेको सेती नदीको बाँधमा मृत भेटिएका छन् ।
कैलालीको धनगढी स्थायी घर भइ हाल पश्चिममाञ्चल इञ्जिनियरिङ क्याम्पस लामाचौरमा अध्ययनरत २१ वर्षीय संगम पौडेल बुधबार साँझ क्याम्पसनजिकै रहेको सेती नदीको बाँधमा मृत भेटिएका हुन् ।
पोखरा महानगरपालिका–१६ दिपहाउजिङ नजिकै रहेको सेती नदीको बाँधबाट एक युवाको खसेको सूचना पाउनासाथ उद्धारका लागि सशस्त्र प्रहरीको कालिका गण कास्कीबाट खटिएको उद्धार टोलीले बुधबार साँझ करिब साढे सात बजे पौडेलको शव निकालेको गणका सूचना अधिकारी डिएसपी राजनलाल श्रेष्ठले जानकारी दिनुभयो ।
क्याम्पसनजिकै पोखरा–१९ लामाचौरमा डेरा गरी बस्दै आएका पौडेल बुधबार साँझ ७ बजेर २० मिनेटमा सेतीको बाँधमा खसेको सूचना आएको सशस्त्र प्रहरीले जानकारी दिएको छ ।
उक्त सूचना पाउनासाथ सशस्त्र प्रहरीको चार जना गोताखोरसहित नौ जनाको विशेष विपद् व्यवस्थापन टोलीले उनको शव निकाली पोस्टमार्टमका लागि मनिपाल शिक्षण अस्पताल पठाइएको छ ।