प्रधानमन्त्रीद्वारा अन्तर्राष्ट्रिय पदक विजेता खेलाडीलाई पुरस्कार प्रदान

काठमाडौँ, २३ पुस । प्रधानमन्त्री केपी शर्मा ओलीले साफ महिला फुटबल, एसियाली कराँते र काबाबीच भलिबल खेलमा पदक विजेता खेलाडी, प्रशिक्षक र व्यवस्थापनकहरुलाई मंगलबार सम्मान र पुरस्कार प्रदान गर्नुभएको छ ।

युवा तथा खेलकुद मन्त्रालयद्वारा मंगलबार प्रधानमन्त्री निवास, बालुवाटारमा आयोजित कार्यक्रममा नेपाल सरकार, मन्त्रिपरिषद्को गत मंसिर २८ गतेको निर्णयबमोजिम तोकिएको मापदण्डका आधारमा पुस्कार प्रदान गरिएको हो । प्रधानमन्त्री ओलीको निर्देशनपछि खेल क्षेत्रमा दिइने पुरस्कारमा कर छुट हुँदै आएको छ ।

गत कात्तिक १ गतेदेखि १४ गतेसम्म काठमाडौँमा भएको साफ वुमन च्याम्पियनसिप, फुटबलमा पदक विजेता अमृता जैसी, मुख्य प्रशिक्षक राजेन्द्र तामाङ र व्यवस्थापक वृन्दा देवानलगायत तथा चीनको हाइजाओमा गत असोज १ गतेदेखि ७ गतेसम्म भएको २०औँ एसियाली कराँते च्याप्यियनसिफमा पदक विजेता एरिका गुरुङ, मुख्य प्रशिक्षक कुशल श्रेष्ठलगायतलाई पुरस्कार प्रदान गरिएको छ ।

यस्तै, गत साउन १७ गतेदेखि २० गतेसम्म भुटानको थिम्पुमा भएको काबा बिच महिला तथा पुरुष भलिबल प्रतियोगितामा विजेता कमला पुन, मनिषकुमारी चौधरी, प्रशिक्षक रुपेशकुमार विष्टलाई पुरस्कार प्रदान गरियो ।

खेल क्षेबाट अन्तर्राष्ट्रिय जगतमा राष्ट्रको गौरव वृद्धिमा महत्त्वपूर्ण योगदान दिएकामा उहाँहरुलाई सम्मान र पुरस्कार प्रदान गरिएको हो ।

कार्यक्रममा प्रधानमन्त्री ओलीले विजेतालाई बधाई दिँदै हिम्मत लियो भने खेल जित्न सकिन्छ भन्ने उच्च मनोबल लिएर प्रतियोगितामा लाग्न आग्रह गर्दै खेलमा टिम स्पिरिट र कम्बिनेसन महत्त्वपूर्ण हुने बताउनुभयो । उहाँले नेपाली खेलको सर्वत्र उन्नति र प्रगति होस् भन्ने आग्रह गर्दै त्यसका लागि लाग्न आग्रह गर्नुभयो ।

युवा तथा खेलकुदमन्त्री तेजुलाल चौधरीले अन्तर्राष्ट्रिय प्रतियोगितामा विजेता भई पुरस्कार दिन बाँकी अन्य खेलाडीहरुको विवरण चाँडो पठाइदिन सम्बन्धित पक्षलाई आग्रह गर्दै आएको जानकारी दिनुभयो ।

उहाँले भन्नुभ्यो, ‘आज तीन खेलका पुरस्कारहरु हामीले वितरण गरेका छौँ तर कति खेलको पुरस्कार वितरण्न गर्न बाँकी होला अहिलेसम्म त्यो पत्रहरु विभिन्न कारणले आइपुगेको छैन । तत्कालै त्यो पत्रहरु उपलब्ध गराइ दिनका लागि मैले आग्रह गर्छु । सिफारिस गर्ने बेला पक्षपात गरेको जस्तो देखिन्छ । त्यसकारण ऐन कानुनले पाउने पुरस्कारलाई समयमा नै पठाउन आग्रह गर्न चाहन्छु ।’

यस्तै, सोही क्रममा नेपाल खेलकुद परिषद्का सदस्यसचिव टंकलाल घिसिङ्ले पुरस्कार प्राप्ति छिटो नहुँदा कहिलेकाही निराशा पनि पैदा हुने गरेको भन्दै अहिले पुरस्कारसम्बन्धी कानुन बनेको एउटा खुसीको कुरा भएको बताउनुभयो ।

उहाँले भन्नुभयो, ‘पुरस्कार खेलाडीहरुको हौसला बढाउनका लागि अति नै आवश्यक हुन्छ तर त्यो पुरस्कार प्राप्ती छिटो छरितो हिसाबले नहुँदा कहिलेकाही निराशा पनि पैदा हुने गर्दछ । तर, अहिले कानुनले नै यसलाई सुनिश्चित गरेको छ र यो एउटा खुसीको कुरा हो ।’