शेरा दरबारको जग्गाका विषयमा गम्भीरतापूर्वक अनुसन्धान भइरहेको छ : गृहमन्त्री लेखक
काठमाडौँ, १८ पुस । गृहमन्त्री रमेश लेखकले शेरा दरबारको जग्गासम्बन्धी विषयमा गम्भीरतापूर्वक अनुसन्धान भइरहेको भन्दै कानुन बमोजिम कारबाही अगाडि बढाउने बताउनुभएको छ ।
बिहीबार सिंहदरबारमा बसेको राज्य व्यवस्था तथा सुशासन समितिको बैठकमा उहाँले पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’लाई ‘गैर कानुनी ढंगले गएको फिर्ता हुन्छ तपाई सरकारलाई धन्यवाद दिन तयार भएर बस्नु’ भन्दै जवाफ दिनुभएको हो ।
उहाँले भन्नुभयो,‘शेरा दरबारको जग्गासम्बन्धी विषयमा गम्भीरतापूर्वक अनुसन्धान भइरहेको छ । अनुसन्धान हुन्छ । र कानुन बमोजिम कारबाही अगाडि बढ्छ । यदि त्यो जग्गा गलत ढंगले कसै व्यक्ति, कम्पनीका नाममा गएको भने त्यो फिर्ता हुन्छ । पूर्वप्रधानमन्त्री प्रचण्डजीले यदि गैरकानुनी ढंगले गएको छ भने त्यो फिर्ता हुनुपर्छ भन्नुभएको छ । उहाँले सरकारलाई धन्यवाद दिन तयार भएर बस्नुभएको छ । तपाई सरकारलाई धन्यवाद दिन तयार भएर बस्नुभए हुन्छ । सरकारले यसमा गर्नुपर्ने काम गर्छ । धन्यवाद लिन्छ ।’
प्रचण्ड कारवाही भोग्न तयार
बैठकमा प्रचण्डले राज्यको जमिन व्यक्तिको नाममा गएको छ र छानबिन गर्दै जाँदा प्रचण्ड नै देखिएको छ भनेपनि छानबिनको दायरामा ल्याउन आग्रह गर्नुभएको थियो ।
उहाँले आफूले ललिता निवासको जग्गा सरकारको नाममा फिर्ता गरे जस्तै शेरा दरबारको जग्गा पनि फिर्ता ल्याएमा सहयोगका साथै सरकारलाई धन्यवाद पनि दिने बताउनुभयो ।
उहाँले भन्नुभयो,‘राज्यको र सरकारको जमिन कुनै व्यक्तिको नाममा गर्छ भने जो कोही होस् कानुन बमोजिम ल्याउनुपर्छ । यदि छानबिन गर्दै जाँदा प्रचण्ड नै देखापर्यो भने त्यसलाई पनि छानबिनको दायरामा ल्याउनुपर्छ । दोषीलाई कारबाही गरियोस् सरकारलाई सहयोग गर्न म तयार छु भनेकै छु । कानुनविपरीत काम भएको छ भने जसरी ललिता निवासको कयौँ रोपनी जग्गा सरकारको नाममा ल्याइयो त्यसरी नै शेरा दरबारको पनि भयो भने जग्गा पनि म सरकारलाई लागि सहयोग मात्र होइन धन्यवाद पनि भन्नेछु ।
फाइल खोल्दिन्छु भनेको सुन्दा सुन्दा नागरिक आजित छन्ः गगन थापा
त्यस्तै, नेपाली कांग्रेसका महामन्त्री समेत रहनुभएका प्रतिनिधिसभा सदस्य गगन थापाले प्रधानमन्त्री केपी शर्मा ओली, पूर्वप्रधानमन्त्री शेरबहादुर देउवा र अर्का पूर्वप्रधानमन्त्री प्रचण्डको उपस्थितिमा भ्रष्टाचारको फाइल टुंगो लगाउनुपर्ने बताउनुभएको छ ।
फाइल खोल्दिन्छु भनेको सुन्दा सुन्दा नागरिक नै आजित भएको अवस्था रहेको भन्दै उहाँले राज्य व्यवस्था तथा सुशासन समितिको बैठकमा नै तीन जनालाई बोलाएर कुन–कुन कण्डको फाइल खोल्ने हो टुंगो लगाउन सुझाव दिनुभयो ।
उहाँले भन्नुभयो, ‘यहाँ पूर्वप्रधानमन्त्री आजको बैठकमा आउनुभएको छ । अर्को पूर्वप्रधानमन्त्री अर्को समितिमा आइराख्नुभएको छ । बरु अर्को एकजना पूर्वप्रभानमन्त्रीलाई चाहिँ आमन्त्रित गरेर भएता पनि यही समितिमा बसरे छलफल गरौँ । भ्रष्टाचारको कुन–कुन कण्डको फाइल खोल्ने हो टुंगो लगाउँ । फाइल खोल्दिन्छु भनेको सुन्दा सुन्दा नागरिक नै आजित भएको अवस्था छ ।’