चितवनमाथि कर्णालीको रोमाञ्चक जित
काठमाडौँ, २१ मंसिर । नेपाल प्रिमियर लिग (एनपिएल) मा कर्णाली याक्सले चितवन राइनोजमाथि रोमाञ्चक जित हासिल गरेको छ ।
शुक्रबार त्रिवि मैदानमा चितवनले दिएको १३१ रनको सामान्य लक्ष्य कर्णालीले ४ विकेट गुमाएर १ बल बाँकी रहँदा पूरा गर्दै पहिलो जित निकालेको हो ।
कर्णालीको तीन खेल मध्यको यो पहिलो जित हो भने चितवनको यो पहिलो हार हो ।
क्र्णालीको जितमा शिखर धवनले ४५, चाडविक वाल्टनले ३० तथा देव खनालले २५ रनको योगदान दिए । यस्तै, जिसन मक्सुदले अविजित १२ तथा अर्जुन घर्तीले ११ रन बनाए ।
यसअघि टस हारेर पहिले ब्याटिङ गरेको चितवनले रवि बोपाराको अर्धशतको मद्धतले निर्धारित २० ओभरमा सात विकेटको क्षतिमा १३० रन बनाएको थियो । त्यस्तै, कप्तान कुशल मल्लले २३ र विपिन रावल ११ रन बनाए ।
कर्णालीका विपिन शर्माले तीन विकेट लिए । जिसान मक्सुदले दुई विकेट तथा नन्दन यादव र सोमपाल कामीले समान एक–एक विकेट लिए ।