एनपिएलमा आज पनि दुई खेल हुँदै
काठमाडौँ, १९ मंसिर । नेपाल प्रिमियर लिग (एनपिएल) अन्तर्गत बुधबार दुई पनि खेल हुँदै छन् ।
कीर्तिपुरस्थित त्रिवि क्रिकेट मैदानमा जारी प्रतियोगितामा आजको पहिलो खेल कर्णाली याक्स र काठमाडौँ गोर्खाजबीच हुने छ । खेल बिहान ९ बजे सुरु हुने छ । कर्णालीका कप्तानीमा सोमपाल कामी छन् भने काठमाडौँ गोर्खाजका कप्तानमा करण केसी छन् ।
कर्णाली र काठमाडौँ दुवै यो दोस्रो खेल हो, यो भन्दा अगाडिको खेलमा दुवै टिमले जित हासिल गर्न सकेको थिएन । कर्णाली पहिलो खेलमा जनकपुरसँग ८ विकेटले पराजित हुँदा काठमाडौँ पहिलो खेलमा चितवनसँग ५ विकेटले पराजित भएको थियो ।
यस्तै, दोस्रो खेल भने विराटनगर किंग्स र लुम्बिनी लायन्सबीच हुँदै छ । खेल आज दिउँसो १ बजे सुरु हुने छ । विराटनगरको यो तेस्रो खेल हो भने लुम्बिनी पहिलो खेल खेल्दै छ । विराटनगरले दुई खेलमा नै जित हासिल गर्न सकेको छैन ।
विराटनगर उद्घाटन खेलमा जनकपुर बोल्ट्ससँग ८ विकेट र दोस्रो खेलमा सुदूरपश्चिमसँग ९० रनले पराजित भएको थियो ।
लुम्बिनीका कप्तानमा राष्ट्रिय टिमका कप्तान रोहित पौडेल छन् भने विराटनगरमा सन्दीप लामिछाने छन् ।