कांग्रेसको कोषाध्यक्षमा उमेश श्रेष्ठ मनोनित
काठमाडौँ, ९ मंसिर । नेपाली कांग्रेसको केन्द्रीय कोषाध्यक्षमा उमेश श्रेष्ठ मनोनित हुनुभएको छ । सभापति शेरबहादुर देउवाले केन्द्रीय सदस्य श्रेष्ठलाई कोषाध्यक्षमा मनोनयन गर्नुभएको कांग्रेसले विज्ञप्तिमार्फत् जनाएको छ ।
‘नेपाली कांग्रेसका सभापति श्री शेरबहादुर देउवाले नेपाली कांग्रेसको विधान, २०१७ (संशोधनसहित) को धारा २१ को उपधारा (४) बमोजिम केन्द्रीय कार्यसमितिका निर्वाचित सदस्य श्री उमेश श्रेष्ठलाई नेपाली कांग्रेस केन्द्रीय कार्यसमितिको कोषाध्यक्ष पदमा मनोनयन गर्नुभएको छ,’मुख्यसचिव कृष्ण प्रसाद पौडेलद्वारा जारी विज्ञप्तिमा भनिएको छ ।
कांग्रेसको १४औँ महाधिवेशन सम्पन्न भएको लामो समयसम्म कोषाध्यक्ष पद रिक्त थियो । पूर्वमन्त्रीसमेत रहनुभएका श्रेष्ठ व्यवसायीसमेत हुनुहुन्छ । उहाँ लामो समयदेखि कांग्रेसको आर्थिक विभागमा हुनुहुन्थ्यो ।
कांग्रेसको विधानअनुसार १४ सदस्यीय पदाधिकारीमध्ये १३ जना महाधिवेशनबाट निर्वाचित हुने व्यवस्था छ ।