पर्यटनमन्त्रीले नेपाललाई ‘रिटायर्ड टुरिज्म’को गन्तव्य बनाउन सक्नुपर्छ : लाक्पाफुटी शेर्पा

काठमाडौँ, २५ असोज । पर्यटन व्यवसायी एवम् पर्वतारोही लाक्पाफुटी शेर्पाले नेपालमा ‘रिटायर्ड टुरिज्म’ सम्भावना रहेकाले सरकारले त्यसको अवधारणा अघि सार्नुपर्ने सुझाव दिनुभएको छ ।

नेपाल न्यूज बैंकसँगको कुराकानीमा उहाँले विदेशीहरु आफ्नो अवकाश जीवन नयाँ ठाउँ घुमेर बिताउन चाहने भएकाले नेपालले ‘रिटायर्ड टुरिज्म’को अवधारणा बनाएर प्रवर्द्धन गर्नुपर्ने सुझाव दिनुभएको हो ।

‘यतिबेला राइट ठाउँमा राइट मिनिस्ट्री हुनुहुन्छ । मन्त्री बद्री पाण्डेको सुरुवाती नै राम्रो देखिएको छ । जस्तो पर्यटन बोर्डको सिइओ नियुक्तिदेखि आर्थिक प्रलोभनमा उहाँ पर्नुहुन्छ जस्तो लाग्दैन । त्यसैले उहाँलाई मेरो सुझाव के छ भने नेपालमा थप दशवटा जहाज किन्नुपर्छ । साथै विदेशी नागरिकले आफ्नो देशमा ६५ वर्षसम्म काम गर्छन् । त्यसपछि घुम्न चाहन्छन् । उनीहरुलाई नेपाल घुम्न र बस्नका लागि फ्रि भिसाको अवधारणा ल्याएर वा कुनै सहुलियत दिलाएर नेपाल भित्र्याउन सक्नुपर्छ,’ उहाँले भन्नुभयो,‘मन्त्री पाण्डेकै कार्यकालमा रिटायर्ड टुरिज्म सुरु होस् । उनीहरु अपार्टमेन्ट वा लक्जरी होटलमा बस्न रुचाउँछन र खर्च गर्न चाहन्छन् । अवकास जीवन बिताइरहेकाहरु परिवारनै नेपाल घुम्न आउने वातावरण बनाउनुपर्छ ।’

हुनतः काम गर्नेहरुलाई नेपालको सिस्टमले अवरोध खडा गर्ने उल्लेख गर्दै उहाँले १० वटा जहाज खरिद गर्न र रिटायर्ड टुरिज्म विकास गर्न ढिला गर्न नहुने बताउनुभयो । प्राकृतिक र वातावरणीय दृष्टिकोणले बस्नका लागि नेपाल उपयुक्त गन्तव्य भएकाले एउटा निश्चित मापदण्ड बनाएर रिटायर्ड पर्यटक नेपाल ल्याउनुपर्ने बताउनुभयो ।

उहाँले पर्यटन क्षेत्रमा सरकारले लगाइरहेको केही अनावश्यक कर हटाउन पनि माग गर्नुभयो । नेपाल कृषि पर्यटनका लागि उपयुक्त भएकाले विश्वका विभिन्न देशमा कृषिजन्य वस्तुहरु निर्यात गर्न सकिने भएकाले एग्रो टुरिज्मको विकासमा लाग्नुपर्ने बताउनुभयो । नेपालमा इमान्दार र विधिपूर्वक व्यवसाय गरिरहेकाहरुलाई माफिया भनेर आरोप लगाउने गरेको भन्दै माफिया शब्दप्रति आपत्ति जनाउनुभयो ।