अब हामी गर्वकासाथ भन्न सक्छौँ, हामीसँग पनि ओलम्पिक मेडल छ : पलेशा गोवर्द्धन
काठमाडौँ, १९ भदौ । पेरिस पारालम्पिकमा कास्य पदक विजेता पलेशा गोवर्द्धनले अब नेपालसँग पनि ओलम्पिक पदक छ भनेर गर्वकासाथ भन्न पाउने इतिहास बनाउन पाउँदा निकै खुसी लागेको बताउनुभएको छ ।
बुधबार राष्ट्रिय खेलकुद परिषद्को स्वागत कार्यक्रममा उहाँले सबैले पलेशाले मेडल लिएर आउँछ भनेर आशा गरिरहेको अवस्थामा त्यो आशालाई आफूले पूरा गरेर फर्किएको भन्दै नेपालसँग पनि ओलम्पिक पदक छ भन्ने इतिहास बनाउन पाउँदा निकै खुसी लागेको बताउनुभयो ।
उहाँले भन्नुभयो,‘एकदमै खुसी छु म आज किनकी मैले आशा गरेको थिइनँ कि आज गोल्ड मेडल हात मार्न सक्छु भनेर, सबैले एउटा आशा गर्नुभएको थियो कि पलेशाले गोल्ड मेडल लिएर आउँछ भनेर मैले त्यो पूरा गरेर फर्किएकी छु । यो मेडल मेरो मात्र होइन सबैको हो । अब हामी गर्वकोसाथ भन्न सक्छौँ कि हामीसँग पनि एउटा ओलम्पिक मेडल छ ।’
विमानस्थलबाट मन्त्री, सदस्यसचिव र पदक विजेता पलेशासहितको गाडीलाई नगर परिक्रमा गराइएको थियो । पलेशालाई एयरपोर्ट, गौशाला, पुरानो बानेश्वर, मैतीदेवी, डिल्लीबजार, बागबजार, भद्रकाली, सहिदगेट, त्रिपुरेश्वर चोक हुँदै राष्ट्रिय खेलकुद परिषद्मा पुर्याएर स्वागत गरिएको हो ।