विराटनगरका लागि उडेको जहाज चन्द्रगढीमा आकस्मिक अवतरण

झापा, ९ भदौ । कोशी प्रदेशका मुख्यमन्त्री हिक्मत कुमार कार्की सवार बुद्ध एयरको जहाज आइतबार विराटनगरमा अवतरण गर्न नसकेपछि झापाको चन्द्रगढी विमानस्थलमा आकस्मिक अवतरण गरिएको छ ।

काठमाडौँबाट विराटनगर आउँदै गरेको बुद्ध एयरको ७०५ विमान भद्रपुरमा अवतरण गरिएको हो । विराटनगरमा मौसम खराब भएपछि भद्रपुरमा आकस्मिक अवतरण गरिएको नागरिक उड्ययन कार्यालय चन्द्रगढीका प्रमुख किशोर कुमार खत्रीले जानकारी दिनुभयो ।

दिउँसो साढे २ बजे चन्द्रगढीमा अवतरण भएको विमान मौसममा सुधार भएपछि विराटनगरतर्फ नै उडेको उहाँले बताउनुभयो । मुख्यमन्त्रीसहित अरु यात्रुहरु चन्द्रगढी विमानस्थलमा विमानभित्रै बसेका थिए । विमानमा चालक दलसहित ७० जना यात्रु रहेका थिए । विमान आधा घन्टापछि बिराटनगरमा अवतरण भइसकेको जनाइएको छ ।