जहाज दुर्घटनामा प्रत्यक्षदर्शीले भने– ‘पाइलट भाग्यले बाँचे’
काठमाडौँ, ९ साउन । पोखरा उडानका क्रममा सौर्य एयरलाइन्सको ९ एन एएमई जहाज त्रिभुवन अन्तर्राष्ट्रिय विमानस्थलमा दुर्घटनामा परेको छ ।
एयरलाइन्सका १९ टेक्निकल स्टाफसहितलाई लिएर पोखराको लागि उडान भर्ने क्रममा बुधबार सौर्यको जहाज दुर्घटनामा परेको हो ।
विमानस्थलमा दुर्घटना हुँदा प्रत्यक्षदर्शी राज चौलागाईंले सुरूमा धुवा आएर बङ्करमा ठोक्किएको बताउनुभयो । उहाँले ठोकिएपछि जहाज दुई टुक्रा भएर खाल्डोमा खसेको जिकिर गर्नुभयो ।
उहाँले भन्नुभयो, ‘जहाज पहिले नै हिट भइसकेको थियो होला त्यसपछि भित्तामा हिट भइसकेपछि जहाजमा आगलागी भयो, घिस्रिने क्रममा जहाजको ककपिट एयर डाइनेस्टीको कन्टेनरमा ठोक्कियो । कन्टेनरलाई घिसारेर तल पुर्यायो । जहाजको एक भाग यसैमा अड्कियो । अर्को भाग उछिट्टिएर अझै पर पुग्यो । दुवै ठाउँमा ठुलो आगलागी भयो, केही बाच्ने अवस्था थिएन तर पाइलट भाग्यले बाँचे होलान् । ’
साथै उहाँले यस्ता घटनाहरूमा सरकारले ध्यान दिनुपर्ने बताउनुभयो । समयमै उद्धार भए पनि सरकार यस्ता घटनामा जहिले कमजोर रहेको दाबी गर्नुभयो ।
यस्तै, यो घटनाका प्रत्यक्षदर्शी सुनिल केसीले सुरक्षाकर्मी सबैले उद्धारमा राम्रोसँग आफ्नो कर्तव्य निभाएको बताउनुभयो । उहाँले यो छोटो समयमा सबैको उद्धार गर्न सफल सुरक्षा टोलीलाई धन्यवादसमेत व्यक्त गर्नुभयो ।
सम्बन्धित समाचार
सौर्यको जहाजमा थिए १ विदेशीसहित १७ जना सवार [सूचीसहित]
जहाज दुर्घटनामा परेका सबै सौर्यकै कर्मचारी, १८ जनाको शव निकालियो